ന്യൂഡെൽഹി: 2022 ഏപ്രിൽ-സെപ്റ്റംബർ കാലയളവിൽ വൈദ്യുതി ഉൽപ്പാദനത്തിൽ 15.1 ശതമാനം വളർച്ച കൈവരിച്ചതായി എൻടിപിസി അറിയിച്ചു. പ്രസ്തുത കാലയളവിൽ 203.5 ബില്യൺ യൂണിറ്റിന്റെ (ബിയു) ഉൽപ്പാദനമാണ് കമ്പനി രേഖപ്പെടുത്തിയത്. 2021 ഏപ്രിൽ മുതൽ സെപ്റ്റംബർ വരെയുള്ള കാലയളവിൽ ഇത് 176.8 ബിയു ആയിരുന്നു.
ഉയർന്ന ഉൽപ്പാദന വളർച്ച ഈ വർഷത്തെ മെച്ചപ്പെട്ട പ്രകടനത്തെയും വൈദ്യുതി ആവശ്യകതയിലെ വർധനയെയും സൂചിപ്പിക്കുന്നതായി കമ്പനി പറഞ്ഞു. ഈ കാലയളവിൽ 90.22 ശതമാനം പ്ലാന്റ് ലോഡ് ഫാക്ടർ രേഖപ്പെടുത്തിയ ഉത്തർപ്രദേശിലെ എൻടിപിസി റിഹാൻഡ് (3,000 മെഗാവാട്ട്) കമ്പനിയുടെ ഏറ്റവും മികച്ച താപവൈദ്യുത നിലയമാണ്.
അതേസമയം അവലോകന കാലയളവിലെ എൻടിപിസി കൽക്കരി സ്റ്റേഷനുകളുടെ മൊത്തത്തിലുള്ള പിഎൽഎഫ് 76.3 ശതമാനമാണ്. എൻടിപിസിയുടെ മൊത്തം സ്ഥാപിതശേഷി 70,234 മെഗാവാട്ടാണ്.
കൂടാതെ കമ്പനി നിലവിൽ ഗ്രീൻ ഹൈഡ്രജൻ, മാലിന്യത്തിൽ നിന്ന് ഊർജം, ഇ-മൊബിലിറ്റി തുടങ്ങിയ പുതിയ ബിസിനസ് മേഖലകളിൽ അതിന്റെ കാൽപ്പാടുകൾ വികസിപ്പിക്കുകയാണ്.
