മുംബൈ: അസം സ്റ്റേറ്റ് ട്രാൻസ്പോർട്ട് കോർപ്പറേഷനിൽ നിന്ന് 100 ഇലക്ട്രിക് ബസുകളുടെ വിതരണത്തിനുള്ള ഓർഡർ നേടിയതായി അറിയിച്ച് പ്രമുഖ ഇലക്ട്രിക് മൊബിലിറ്റി കമ്പനിയായ ഒലെക്ട്ര ഗ്രീൻടെക് ലിമിറ്റഡ് (ഒലെക്ട്രാ). 151 കോടി രൂപയാണ് നിർദിഷ്ട ഓർഡറിന്റെ മൂല്യം.
ഒലെക്ട്ര ഗ്രീൻടെക് ലിമിറ്റഡിന് (ഒലെക്ട്ര/കമ്പനി) 100 ഇലക്ട്രിക് ബസുകൾക്കായി സംസ്ഥാന ട്രാൻസ്പോർട്ട് കോർപ്പറേഷനുകളിലൊന്നിൽ നിന്ന് ലെറ്റർ ഓഫ് അവാർഡ് ലഭിച്ചതായി കമ്പനി പറഞ്ഞു. 100 ഇലക്ട്രിക് ബസുകൾ വിതരണം ചെയ്യുന്നതിനുള്ള ഈ ഓർഡർ പൂർണ്ണമായ വിൽപ്പന അടിസ്ഥാനത്തിലാണെന്നും. ഇത് 9 മാസത്തിനുള്ളിൽ വിതരണം ചെയ്യുമെന്നും കമ്പനി സ്റ്റോക്ക് എക്സ്ചേഞ്ച് ഫയലിംഗിൽ അറിയിച്ചു.
ഈ ബസുകളുടെ 5 വർഷത്തേക്കുള്ള അറ്റകുറ്റപ്പണികൾക്കുള്ള ഉത്തരവാദിത്തം ഒലെക്ട്ര ഗ്രീൻടെക്കിനായിരിക്കും. അടുത്തിടെ തെലങ്കാന സ്റ്റേറ്റ് റോഡ് ട്രാൻസ്പോർട്ട് കോർപ്പറേഷന് (ടിഎസ്ആർടിസി) 500 കോടി രൂപ വിലമതിക്കുന്ന 300 ഇലക്ട്രിക് ബസുകൾ വിതരണം ചെയ്യാനുള്ള ഓർഡർ ഒലെക്ട്ര നേടിയിരുന്നു. ഇതിന്റെ വിതരണം 20 മാസത്തിനുള്ളിൽ പൂർത്തിയാക്കും.
നിലവിൽ പൂനെ (പി‌എം‌പി‌എം‌എൽ), മുംബൈ (ബെസ്റ്റ്), ഗോവ, ഡെഹാറാഡൂൺ, സൂറത്ത്, അഹമ്മദാബാദ്, സിൽവാസ, നാഗ്പൂർ തുടങ്ങിയ രാജ്യത്തെ വിവിധ സംസ്ഥാന ഗതാഗത സ്ഥാപനങ്ങൾ (എസ്‌ടിയു) ഒലെക്ട്രാ ഗ്രീൻടെക്കിന്റെ ഇലക്ട്രിക് ബസുകൾ പ്രവർത്തിപ്പിക്കുന്നു. 2000-ൽ സ്ഥാപിതമായ ഈ കമ്പനി ഹൈദരാബാദ് ആസ്ഥാനമായുള്ള മേഘ എഞ്ചിനീയറിംഗ് ആൻഡ് ഇൻഫ്രാസ്ട്രക്ചേഴ്സ് ലിമിറ്റഡിന്റെ ഭാഗമാണ്.
