ഇസ്ലാമാബാദ്: അയൽ രാജ്യമായ പാക്കിസ്ഥാനിൽ അടിസ്ഥാന പലിശ നിരക്ക് വീണ്ടും വർധിപ്പിച്ചു. തിങ്കളാഴ്ച ചേർന്ന പാക്കിസ്ഥാൻ കേന്ദ്ര ബാങ്കിന്റെ (എസ്ബിപി) ധനനയ സമതിയുടെ അടിയന്തര യോഗത്തിലാണ് പലിശ നിരക്കിൽ 100 അടിസ്ഥാന പോയിന്റ് (1%) വർധന നടപ്പാക്കിയതായി പ്രഖ്യാപിച്ചത്.
ഇതോടെ പാക്കിസ്ഥാനിലെ പലിശ നിരക്ക് 22% എന്ന റെക്കോഡ് നിലവാരത്തിലേക്ക് ഉയർന്നു. അതേസമയം ഇന്ത്യയിലെ അടിസ്ഥാന പലിശ നിരക്ക് 6.50% (റിപ്പോ റേറ്റ്) നിലവാരത്തിണ് ഉള്ളതെന്നതും ശ്രദ്ധേയം.
ജൂലൈ 1-ന് ആരംഭിക്കുന്ന സാമ്പത്തിക വർഷത്തേക്കുള്ള വാർഷിക ബജറ്റ്, ഗണ്യമായ തോതിൽ വെട്ടിത്തിരുത്തി പാസാക്കിയെടുത്തതിന്റെ അടുത്ത ദിവസമാണ് സ്റ്റേറ്റ് ബാങ്ക് ഓഫ് പാക്കിസ്ഥാൻ (SBP), അപ്രതീക്ഷിതമായി പലിശ നിരക്ക് വർധന പ്രഖ്യാപിച്ചത്.
രാജ്യം നേരിടുന്ന പണപ്പെരുപ്പ ഭീഷണി മറികടക്കുന്നതിനും കടുത്ത സാമ്പത്തിക പ്രതിസന്ധിയുടെ പശ്ചാത്തലത്തിൽ അന്താരാഷ്ട്ര നാണയ നിധിയിൽ (IMF) നിന്നും തടഞ്ഞുവെയ്ക്കപ്പെട്ട ധനസഹായം വിട്ടുകിട്ടുന്നതിനുള്ള ശ്രമമെന്ന നിലയിലാണ് ഈ രണ്ട് നീക്കങ്ങളെയും സാമ്പത്തിക വിദഗ്ധർ കണക്കാക്കുന്നത്.
നേരത്തെ ഐഎംഎഫ് അനുവദിച്ച ധനസഹായത്തിൽ 110 കോടി ഡോളറിന്റെ ഗഡു തടഞ്ഞുവെച്ചിരുന്നു. ധനപരമായ അച്ചടക്കം ഉൾപ്പെടെയുള്ള നിരവധി കാരണങ്ങൾ ചൂണ്ടിക്കാട്ടിയായിരുന്നു ഐഎംഎഫ് നടപടി.
ഇതിന്റെ കാലാവധി ജൂൺ 30-ന് അവസാനിക്കാനിരിക്കെയാണ് പാക്കിസ്ഥാൻ ഭരണകൂടം അടിയന്തര നടപടികളുമായി രംഗത്തെത്തിയത്.
അതേസമയം രാജ്യത്ത് കുത്തനെ ഉയർന്ന പണപ്പെരുപ്പം നിയന്ത്രിക്കുന്നതിനായി, സ്റ്റേറ്റ് ബാങ്ക് ഓഫ് പാക്കിസ്ഥാൻ, 2022 ഏപ്രിലിന് ശേഷം അടിസ്ഥാന പലിശ നിരക്കിൽ 12.25% വർധനയാണ് നടപ്പാക്കിയിട്ടുള്ളത്.
ജൂൺ 12-ന് ചേർന്ന ധനനയ സമിതി യോഗം പലിശ നിരക്കിൽ വർധന ശുപാർശ ചെയ്യാതെയാണ് കടന്നുപോയത്. “കഴിഞ്ഞ യോഗത്തിനു ശേഷം രണ്ട് പ്രധാന മാറ്റങ്ങൾ സംഭവിച്ചിട്ടുണ്ട്. പണപ്പെരുപ്പ അനുമാനം പ്രതികൂലമായതും കറന്റ് അക്കൗണ്ടിലെ സമ്മർദവും കാരണമാണ് പലിശ നിരക്ക് ഉയർത്തിയത്,“ എസ്ബിപിയുടെ പത്രക്കുറിപ്പിൽ പറഞ്ഞു.
“ഇതും ഐഎംഎഫിന്റെ ഭാഗത്ത് നിന്നുള്ള വ്യവസ്ഥയുടെ ഭാഗമായിട്ടാകും. ഉയർന്ന നിരക്ക്, കടം തിരിച്ചടയ്ക്കേണ്ട സർക്കാർ, സ്വകാര്യ മേഖലയിലെ സ്ഥാപനങ്ങൾക്ക് പലിശഭാരം കൂട്ടുന്ന നടപടിയാണ്.
പക്ഷേ ഇതിലൂടെ ഐഎംഎഫ് ധനസഹായം ലഭിച്ചാൽ കിട്ടാവുന്ന പോസിറ്റീവ് ഘടകങ്ങൾക്ക് ഇപ്പോഴത്തെ നടപടിയിലൂടെ ഉണ്ടാകാവുന്ന നെഗറ്റീവ് ഘടകങ്ങളെ മറികടക്കാൻ സാധിച്ചേക്കും,“
കറാച്ചിയിലെ ബ്രോക്കറേജ് സ്ഥാപനമായ ഇസ്മായിൽ സെക്യൂരിറ്റീസിന്റെ റിസർച്ച് വിഭാഗം തലവൻ ഫഹദ് റൗഫ് പറഞ്ഞു.
