കൊച്ചി: ഡീലർഷിപ്പുകളില്‍(Dealerships) കെട്ടികിടക്കുന്ന വാഹനങ്ങളുടെ എണ്ണം കുതിച്ചുയരുന്നതിനാല്‍ വിപുലമായ ഇളവുകളും അധിക ആനുകൂല്യങ്ങളും ലഭ്യമാക്കി പ്രതിസന്ധിയില്‍(Crisis) നിന്ന് കരകയറാനാവാതെ പ്രമുഖ വാഹന ഡീലർമാർ(Vehicle Dealers) വലയുന്നു.
സാമ്പത്തിക മേഖലയിലെ തളർച്ച മൂലം ഉപഭോക്താക്കള്‍ വാങ്ങല്‍ തീരുമാനം നീട്ടുന്നതിനാല്‍ മുൻപൊരിക്കലുമില്ലാത്ത അനിശ്ചിതത്വത്തിലൂടെയാണ് വാഹന ഡീലർമാർ കടന്നുപോകുന്നത്.
വിവിധ ഡീലർമാരുടെ കൈവശം വില്ക്കാതെ അവശേഷിക്കുന്ന വാഹനങ്ങളുടെ എണ്ണത്തില്‍ ആഗസ്റ്റില് റെക്കാഡ് വർദ്ധനയാണ് ദൃശ്യമായത്.
ഓണം മുതല്‍ തുടങ്ങുന്ന ഉത്സവ കാലയളവില്‍ വലിയ ഓഫറുകള്‍ പ്രഖ്യാപിച്ചാല്‍ പ്രതിസന്ധി ശക്തമാകുമെന്നാണ് ഡീലർമാരുടെ വിലയിരുത്തല്‍.
ഫാക്ടറികളിലെ ഉത്പാദനം കൂടുന്നതിന് അനുസരിച്ച്‌ റീട്ടെയില്‍ വില്പന മെച്ചപ്പെടാത്തതാണ് വിപണിയില്‍ അനിശ്ചിതത്വം ശക്തമാക്കുന്നത്. ഡീലർഷിപ്പുകളില്‍ വില്പന നേടാതെ കെട്ടിക്കിടക്കുന്ന വാഹനങ്ങളുടെ എണ്ണം ചരിത്രത്തിലെ ഏറ്റവും ഉയർന്ന തലത്തിലാണ്.
ഫെഡറേഷൻ ഒഫ് ഓട്ടോമൊബൈല്‍ ഡീലേഴ്‌സ് അസോസിയേഷന്റെ(ഫഡാ) കണക്കുകളനുസരിച്ച്‌ നിലവില്‍ ഒരു ലക്ഷം കോടി രൂപയ്‌ക്കടുത്ത് മൂല്യമുള്ള ഒൻപത് ലക്ഷം വാഹനങ്ങളാണ് ഡീലർമാരുടെ പക്കല്‍ അവശേഷിക്കുന്നത്.
ജൂലായ് തുടക്കത്തില്‍ 65 മുതല്‍ 67 ദിവസം വരെയാണ് വാഹന വില്പനയ്ക്ക് സമയമെടുത്തിരുന്നത്. എന്നാല്‍ ഇപ്പോള്‍ വില്പനയ്ക്കെടുക്കുന്ന സമയം 80 ദിവസം വരെ ഉയർന്നുവെന്ന് ഫഡാ പ്രസിഡന്റ് മനീഷ് രാജ് സിംഗാനിയ പറയുന്നു.
രാജ്യത്തെ പല ഡീലർമാർക്കും വൻ വെല്ലുവിളിയാണ് പുതിയ സാഹചര്യം സൃഷ്ടിക്കുന്നത്. ഉത്സവകാലത്തില്‍ ഉപഭോക്താക്കള്‍ അധിക ആനുകൂല്യങ്ങള്‍ പ്രതീക്ഷിക്കുന്നുവെങ്കിലും സാമ്പത്തിക പ്രതിസന്ധി മൂലം ഡീലർമാർക്ക് ഇളവ് നല്‍കാൻ കഴിയുന്നില്ല.
പരമാവധി 30 ദിവസത്തിനുള്ളില്‍ വില്പന പൂർത്തിയാക്കുന്ന തരത്തില്‍ കമ്ബനികള്‍ ഉത്പാദനം നിജപ്പെടുത്തണമെന്നും ഫഡാ ആവശ്യപ്പെടുന്നു.
ആഗസ്റ്റില് രാജ്യത്തെ യാത്രാ വാഹനങ്ങളുടെ വില്പനയില്‍ വിവിധ ഡീലർഷിപ്പുകളില്‍ 4.5 ശതമാനം ഇടിവാണുണ്ടായത്. ഉത്പാദനം കുറയ്‌ക്കാൻ മാരുതി സുസുക്കി ഉള്‍പ്പെടെയുള്ള കമ്ബനികള്‍ നടപടികള്‍ സ്വീകരിച്ചെങ്കിലും വില്‍ക്കാത്ത വാഹനങ്ങളുടെ എണ്ണം കുത്തനെ കൂടുകയാണ്.
വില്പനയില്‍ ഇടിവുമായി വമ്പൻമാർ
ആഗസ്റ്റില് രാജ്യത്തെ മുൻനിര വാഹന കമ്പനികളായ മാരുതി സുസുക്കി, ടാറ്റ മോട്ടോഴ്സ്, ഹ്യുണ്ടായ് എന്നിവയുടെ വില്പനയില്‍ വലിയ ഇടിവുണ്ടായി. മാരുതി ഡീലർഷിപ്പുകളില്‍ വാഹന വില്പനയില്‍ 8.5 ശതമാനം ഇടിവുണ്ടായി.
ഹ്യുണ്ടായ് വില്പനയില്‍ 12.9 ശതമാനം കുറവുണ്ടായി. ടാറ്റ മോട്ടോഴ്സ് ഡീലർമാരുടെ വില്പന 2.7 ശതമാനം കുറഞ്ഞു.
