കൊച്ചി: കേരളത്തിൽ സ്വര്‍ണവിലയില്‍(Gold Price) കുറവ്. പവന് 80 രൂപ കുറഞ്ഞ് 53,280 രൂപയിലും, ഗ്രാമിന് 10 രൂപ താഴ്ന്ന് 6,660 രൂപയിലുമാണ് ഇന്നു വ്യാപാരം പുരോഗമിക്കുന്നത്.
കഴിഞ്ഞ മൂന്നു ദിവസമായി പ്രാദേശിക വിപണിയില്‍ സ്വര്‍ണം മാസത്തെ ഉയര്‍ന്ന നിലയിലായിരുന്നു വ്യാപാരം ചെയ്തിരുന്നത്.
പവന് 53,360 രൂപയും, ഗ്രാമിന് 6,670 രൂപയുമായിരുന്നു. 51,600 രൂപയിലായിരുന്നു സ്വര്‍ണം മാസം ആരംഭിച്ചത്. ഈ മാസം 7, 8 തീയതികളില്‍ രേഖപ്പെടുത്തിയ 50,800 രൂപയാണു മാസത്തെ താഴ്ന്ന നിലവാരം.
ആഗോള വിപണികളിലെ വിലമാറ്റങ്ങളാണ് പ്രാദേശിക വിലയില്‍ പ്രതിഫലിച്ചത്. ആഗോള വിപണിയില്‍ സ്വര്‍ണം ഔണ്‍സിന് 2,501.51 ഡോളറിലാണു വ്യാപാരം പുരോഗമിക്കുന്നത്. കഴിഞ്ഞ 30 ദിവസത്തിനിടെ ആഗോള വിപണിയില്‍ സ്വര്‍ണവില 4.50% (107.72 ഡോളര്‍) വര്‍ധിച്ചിട്ടുണ്ട്. ആറു മാസത്തെ കുതിപ്പ് 23.58% (477.74 ഡോളര്‍) ആണ്.
ആഗോള വിപണികളിലെ വിലമാറ്റങ്ങള്‍ ഡോളറില്‍ ആയതിനാല്‍ തന്നെ നേരിയ വിലമാറ്റങ്ങള്‍ പോലും പ്രാദേശിക വിലയില്‍ വലിയ മാറ്റങ്ങള്‍ക്കു വഴിവയ്ക്കും. ഡോളര്‍- രൂപ വിനിമയ നിരക്കും ഇവിടെ പ്രധാനമാണ്. പ്രാദേശിക വിപണിയില്‍ ചിങ്ങം പിറന്നതോടെ വിവാഹ ആവശ്യകത ഏറിയിട്ടുണ്ട്. സീസണ്‍ ഡിമാന്‍ഡ് വരും ദിവസങ്ങളില്‍ വില വീണ്ടും ഉയരാന്‍ വഴിവയ്ക്കുമെന്നാണ് സൂചന.
സീസണ്‍ ഡിമാന്‍ഡ് ശക്തമായി നിലനില്‍ക്കുന്നതിനാല്‍ തന്നെ നിലവിലെ ഓരോ ഇറക്കങ്ങളിലും അവസരം കണ്ടെത്താവുന്നതാണ്. ആഭരണപ്രേമികള്‍ ബുക്കിംഗുകള്‍ പരിഗണിക്കുക. ബുക്കിംഗുകള്‍ വഴി വില കുതിച്ചാല്‍ ബുക്കിംഗ് നിരക്കിലും, വില കുറഞ്ഞാല്‍ വിപണി നിരക്കിലും സ്വര്‍ണം സ്വന്തമാക്കാം.
അതേസമയം നിക്ഷേപകര്‍ അല്‍പം കാത്തിരിക്കുന്നത് നല്ലതാണ്. സീസണ്‍ ഡിമാന്‍ഡിനു ശേഷം വിലയില്‍ ഒരു തിരുത്തലിനു സാധ്യതയുണ്ട്.
ദീര്‍ഘകാല നിക്ഷേപകര്‍ക്ക് ഓരോ ഇറക്കങ്ങളിലും അവസരം കാണുവുന്നതാണ്. ഇവര്‍ ആവറേജിംഗിനുള്ള തുക കൈയ്യില്‍ കരുതി പുതിയ വാങ്ങലുകള്‍ നടത്താന്‍ എന്നുമാത്രം. സ്വര്‍ണത്തിന്റെ ദീര്‍ഘകാല ഭാവിയില്‍ വിദഗ്ധര്‍ ഒരുപോലെ ശുഭാപ്തി വിശ്വാസം പ്രകടിപ്പിക്കുന്നു.
അടുത്തിടെ ബജറ്റില്‍ സ്വര്‍ണത്തിന്റെ ഇറക്കുമതി തീരുവ കുറച്ചത് വഴി പ്രാദേശിക വിപണിയില്‍ സ്വര്‍ണവില പവന് 2,000 മുതല്‍ 2,500 രൂപ വരെ കുറഞ്ഞിരുന്നു. എന്നാല്‍ സീസണ്‍ എത്തിയതോടെ ഈ ഇടിവ് സ്വര്‍ണം തിരിച്ചുപിടിച്ചു.
സംസ്ഥാനത്ത് നിലവില്‍ വെള്ളി വിലയില്‍ മാറ്റമില്ല. സ്വര്‍ണവില കുറഞ്ഞ സാഹചര്യത്തില്‍ വരും മണിക്കൂറുകളില്‍ വെള്ളി വിലയിലും തിരുത്തല്‍ കണ്ടെക്കാം. നിലവില്‍ വെള്ളി ഗ്രാമിന് 90.90 രൂപയാണ്. 8 ഗ്രാം വെള്ളിക്ക് 727.20 രൂപയും, 10 ഗ്രാമിന് 909 രൂപയുമാണ്. വെള്ളി കിലോയ്ക്ക് 90,900 രൂപയാണ്.
