ഇക്കഴിഞ്ഞ സെപ്തംബർ പാദത്തിൽ റിലയൻസ് ജിയോയ്ക്ക് തിരിച്ചടി നേരിട്ടു. ഇക്കാലയളവിൽ കമ്പനിക്ക് 10.9 മില്യൺ ഉപയോക്താക്കളെയാണ് നഷ്ടമായത്. ഇത് ഒറ്റ നോട്ടത്തിൽ ജിയോയ്ക്ക് തിരിച്ചടിയെന്ന് തോന്നാമെങ്കിലും അങ്ങനെയല്ലെന്നും വിലയിരുത്തലുകളുണ്ട്.
2024 സെപ്തംബർ പാദത്തിൽ, തൊട്ടു മുമ്പത്തെ പാദത്തെ അപേക്ഷിച്ച് കമ്പനിയുടെ സബ്സ്ക്രൈബർ ബേസ് 489.7 മില്യണിൽ നിന്ന് 478.8 മില്യൺ എന്ന തോതിലേക്ക് താഴ്ന്നു.
2024 ജൂലൈയിൽ കമ്പനി കൊണ്ടു വന്ന താരിഫ് വർധനയാണ് ഇതിന് കാരണമായി വിലയിരുത്തപ്പെടുന്നത്. പൊതുവെ ഓപ്പറേറ്റർമാർ താരിഫ് വർധിപ്പിക്കുമ്പോൾ ഉപയോക്താക്കളുടെ എണ്ണത്തിൽ ചെറിയ കൊഴിഞ്ഞു പോക്ക് ഉണ്ടാകുന്നത് സാധാരണമാണ്.
ജിയോയുടെ ആകെ സബ്സക്രൈബർ ബേസ് പരിശോധിക്കുമ്പോൾ സെപ്തംബർ പാദത്തിൽ 5G സബ്സ്ക്രൈബർ ബേസ് 130 മില്യണിൽ നിന്ന് 147 മില്യണിലേക്ക് ഉയർന്നിട്ടുണ്ട്.
സമാന കാലയളവിൽ ഒരു ഉപയോക്താവിൽ നിന്നുള്ള ശരാശരി വുരമാനം, 2024 സെപ്തംബർ പാദത്തിൽ, തൊട്ടു മുമ്പത്തെ പാദത്തെ അപേക്ഷിച്ച് 181.7 കോടിയിൽ നിന്ന് 195.1 കോടിയായി വർധന നേടി.
ഇത്തരത്തിൽ കമ്പനിയുടെ അറ്റാദായം 6,536 കോടി രൂപയിലേക്ക് ഉയർച്ച നേടി.
സെപ്തംബറിൽ ജിയോയുടെ ആകെ സബ്സ്ക്രൈബർ ബേസ്, പാദ അടിസ്ഥാനത്തിൽ കുറഞ്ഞെങ്കിലും, തൊട്ടു മുമ്പത്തെ വർഷത്തെ സമാന കാലയളവുമായി താരതമ്യം ചെയ്യുമ്പോൾ, വാർഷികാടിസ്ഥാനത്തിൽ 4.2% ഉയർന്നിട്ടുണ്ട്.
അടുത്ത രണ്ട്-മൂന്ന് പാദങ്ങൾക്കകം മാത്രമേ താരിഫ് വർധനയുടെ പ്രതിഫലനം പ്രതീക്ഷിക്കുന്നുള്ളൂവെന്ന് ജിയോ അറിയിച്ചിരുന്നു. നിലവിൽ സബ്സ്ക്രേബേഴ്സിന്റെ എണ്ണം കുറഞ്ഞത് കമ്പനിയെ വലിയ തോതിൽ നിരാശപ്പെടുത്തുന്നില്ല എന്നതിന്റെ സൂചനയായി വ്യാഖ്യാനിക്കപ്പെടുന്നു.
നിലവിൽ ജിയോ, തങ്ങളുടെ 5G നെറ്റ് വർക്ക് ശേഷി വികസിപ്പിക്കാനുള്ള ശ്രമത്തിലാണ്. കൂടുതൽ ഭവനങ്ങളിലേക്ക് തങ്ങളുടെ ഫിക്സഡ് വയർലെസ് ആക്സിസ് എത്തിക്കുന്നതിനാണ് കമ്പനി പ്രാധാന്യം നൽകുന്നത്.
ഒരു പാദത്തിൽ 10.9 മില്യൺ ഉപയോക്താക്കളെ നഷ്ടപ്പെട്ടു എന്നത് ജിയോയുടെ ബിസിനസിന് വലിയ തിരിച്ചടിയാകില്ല എന്നാണ് അനലിസ്റ്റുകൾ നൽകുന്ന സൂചന. ഒരു ഉപയോക്താവിൽ നിന്നുള്ള ശരാശരി വരുമാനം ഉയർന്നതിനാൽ കമ്പനിയുടെ വരുമാനത്തിൽ കുറവ് വന്നിട്ടില്ല എന്നതാണ് കാരണം.
അതേ സമയം വരും പാദങ്ങളിൽ ജിയോയുടെ ഉപയോക്താക്കൾ കൂടുതലായി നഷ്ടപ്പെടുമോ, അതോ കമ്പനിക്ക് പുതിയ ഉപയോക്താക്കളെ ലഭിക്കുമോ എന്നതാണ് കാത്തിരുന്നു കാണേണ്ട കാര്യം.
