ആഗോള വിപണിയില്‍ എണ്ണവില ഉയരുന്നു. റഷ്യയ്‌ക്കെതിരേയുള്ള യുദ്ധം കടുപ്പിക്കാന്‍ ബൈഡന്‍ ഭരണകൂടം യുക്രൈനിന് പച്ചക്കൊടി വീശിയെന്ന റിപ്പോര്‍ട്ടുകളാണ് എണ്ണവില ഉയര്‍ത്തിയത്.
റഷ്യയിലേയ്ക്ക് യുഎസ് നിര്‍മ്മിത ലോംഗ് റേഞ്ച് മിസൈലുകള്‍ പ്രയോഗിക്കാനാണ് യുഎസ് അനുവാദം നല്‍കിയിരിക്കുന്നത്. ബൈഡന്‍ ഭരണകൂടത്തെ ഉദ്ധരിച്ച് ആഗോള വാര്‍ത്ത ഏജന്‍സിയായ റോയിട്ടേഴ്‌സ് ആണ് വാര്‍ത്ത റിപ്പോര്‍ട്ട് ചെയ്തിരിക്കുന്നത്.
വാര്‍ത്ത പുറത്തുവന്നതിനു പിന്നാലെ ആഗോള എണ്ണവിലയില്‍ കയറ്റം ദൃശ്യമായി. യുക്രൈന്‍ റഷ്യന്‍ എണ്ണക്കമ്പനികളെ ലക്ഷ്യം വയ്ക്കാനുള്ള സാധ്യത കൂടുതലാണെന്നു വിദഗ്ധര്‍ പറയുന്നു. തെരഞ്ഞെടുപ്പില്‍ ഡൊണള്‍ഡ് ട്രംപ് വിജയിച്ചതു റഷ്യയ്ക്കു നേട്ടമായേക്കുമെന്ന വിലയിരുത്തലുകള്‍ക്കിടയിലാണ് ബൈഡന്റെ നീക്കം.
ട്രംഗ് അധികാരം ഏറ്റെടുക്കുന്നതിനു മുമ്പ് യുക്രൈനിനെ ശക്തിപ്പെടുത്താനുള്ള ബൈഡന്റെ നീക്കമായാണു വിദഗ്ധര്‍ ഇതിനെ കാണുന്നത്.
24 മണിക്കൂറിനിടെ ബ്രെന്റ് ക്രൂഡ് ബാരലിന് 0.86 ശതമാനം വര്‍ധിച്ച് 71.65 ഡോളറിലെത്തി. ഡബ്ല്യുടിഐ ക്രൂഡ് ബാരലിന് 0.69 ഡോളര്‍ വര്‍ധിച്ച് 67.48 ഡോളറിലെത്തി.
ഒരുവേള ബാരല്‍ വില 70 ഡോളറില്‍ താഴേയ്ക്ക് ഇടിഞ്ഞേക്കുമെന്നു വാര്‍ത്തകള്‍ ശക്തമാകുന്നതിനിടെയാണ് യുദ്ധം കനക്കുമെന്ന സൂചനകള്‍ എത്തിയത്. യുക്രൈന്‍ ആക്രമണം കടുപ്പിച്ചാല്‍ റഷ്യന്‍ എണ്ണയുടെ പൊതുവിപണികളിലേയ്ക്കുള്ള ലഭ്യത ബാധിക്കപ്പെട്ടേക്കാം.
ബൈഡന്‍ സര്‍ക്കാരിന്റെ അനുമതി അടുത്ത കുറച്ച് ദിവസങ്ങള്‍ക്കുള്ളില്‍ സെലന്‍സ്‌കിയും കൂട്ടരും പ്രയോജനപ്പെടുത്തിയേക്കുമെന്നാണു വിവരം. വാഷിംഗ്ടണിന്റെ നടപടി യുദ്ധത്തില്‍ കാര്യമായ വര്‍ധന ഉണ്ടാക്കുമെന്നു റഷ്യ ആവര്‍ത്തിച്ച് മുന്നറിയിപ്പ് നല്‍കിയിട്ടുണ്ട്.
കുര്‍സ്‌കിന് ചുറ്റുമുള്ള റഷ്യന്‍ സേനയെ ലോംഗ് റേഞ്ച് മിസൈലുകള്‍ ഉപയോഗിച്ച് ആക്രമിക്കാനാണ് ബൈഡന്‍ അനുമതി നല്‍കിയിരിക്കുന്നത്.
അതേസമയം ആക്രമണം ഈ മേഖലയില്‍ മാത്രം ഒതുങ്ങുമോയെന്ന ആശങ്ക ശക്തമാണ്. യുക്രൈന്‍ ആക്രമിച്ചാല്‍ റഷ്യ തിരിച്ചടിക്കുമെന്ന കാര്യത്തില്‍ തര്‍ക്കമില്ല. യുഎസ് ഡ്രില്ലിംഗ് പ്രവര്‍ത്തനങ്ങളില്‍ നേരിയ ഇടിവുണ്ടായതും, ഒപെക്ക് പ്ലസില്‍ നിന്നുള്ള എണ്ണയുടെ വരവ് കുറഞ്ഞതും ആശങ്ക വര്‍ധിപ്പിക്കുന്നുണ്ട്.
ഡിമാന്‍ഡ് ആശങ്കകളെ തുടര്‍ന്ന് ഉല്‍പ്പാദനം വര്‍ധിപ്പിക്കല്‍ തീരുമാനം ഒപെക്ക് പ്ലസ് കഴിഞ്ഞ യോഗത്തില്‍ വൈകിപ്പിച്ചിരുന്നു.
അതേസമയം നിലവിലെ ആഗോള എണ്ണവില ഇന്ത്യയ്ക്ക് അനുകൂലമാണ്. ഇന്ത്യയ്ക്ക് വെല്ലുവിളിയാകുന്നത് രൂപയുടെ മൂല്യത്തകര്‍ച്ചയാണ്. ഡോളറിനെതിരേ രൂപ ചരിത്ര താഴ്ചയിലൂടെയാണ് നീങ്ങുന്നത്.
രാജ്യത്ത് പണപ്പെരുപ്പം വര്‍ധിക്കുന്നതും ആശങ്കയാണ്. ആഗോള എണ്ണവില കുറഞ്ഞിരുന്നിട്ടും, രൂപയുടെ മൂല്യത്തകര്‍ച്ച കാരണം കഴിഞ്ഞ പാദത്തില്‍ എണ്ണക്കമ്പനികള്‍ തിരിച്ചടി നേരിട്ടിരുന്നു. അതിനാല്‍ തന്നെ പെട്രോള്‍, ഡീസല്‍ വിലയില്‍ ഉടന്‍ ഇളവുകള്‍ പ്രതീക്ഷിക്കേണ്ടതില്ല.
