മുംബൈ: നിലവിൽ ഇന്ത്യയിലെ രണ്ടാമത്തെ ധനികനായ വ്യക്തിയാണ് ഗൗതം അദാനി. ഫോബ്സിന്റെ കണക്കുകൾ പ്രകാരം ഏകദേശം 670785 കോടി രൂപയാണ് അദ്ദേഹത്തിന്റെ ആസ്തിമൂല്യം. വിവിധ മേഖലകളിൽ പല കമ്പനികളിലായി അദാനി ഗ്രൂപ്പ് ബിസിനസ് നടത്തുന്നു.
അത്തരത്തിൽ ഒരു മേഖലയാണ് പെട്രോകെമിക്കൽസ് ലിമിറ്റഡ്. അദാനി ഗ്രൂപ്പിന്റെ മുന്ദ്രയിലെ പെട്രോൾ കെമിക്കൽ പ്ലാന്റിന് 17000 കോടി രൂപയുടെ വായ്പ നൽകാൻ സ്റ്റേറ്റ് ബാങ്ക് ഓഫ് ഇന്ത്യ (SBI) ഒരുങ്ങുകയാണെന്ന് റിപ്പോർട്ടുകളുണ്ട്.
ഇന്ത്യയിലെ ഏറ്റവും വലിയ വാണിജ്യ ബാങ്കായ എസ്.ബി.ഐ നേതൃത്ത്വം നൽകുന്ന കൺസോർഷ്യമാണ് വായ്പ നൽകാൻ ഒരുങ്ങുന്നത്. പ്ലാന്റിന്റെ മൂലധനച്ചെലവിന്റെ ഏകദേശം 60-70% തുകയാണ് വായ്പയായി നൽകുകയെന്നാണ് കരുതുന്നത്.
അദാനി പെട്രോകെമിക്കൽസ് ലിമിറ്റഡിന്റെ പ്ലാന്റിന് നൽകുന്ന വായ്പ, ഫിനാൻഷ്യൽ ക്ലോഷർ പ്രോഗ്രാമിന്റെ ഭാഗമായേക്കുമെന്നും റിപ്പോർട്ടുകളുണ്ട്. ഈ പ്ലാന്റ് പൂർത്തിയായാൽ അത് ഇന്ത്യയിലെ ഏറ്റവും വലിയ PVC നിർമാണ സൗകര്യമുള്ള ഒന്നായി മാറും.
കഴിഞ്ഞ വർഷം ജനുവരിയിലാണ് അദാനി ഗ്രൂപ്പിനെതിരായ ഹിൻഡൻബർഗ് റിപ്പോർട്ട് പുറത്തു വന്നത്. അദാനി ഗ്രൂപ്പ് ഓഹരിവിലകൾ കൃത്രിമമായി ഉയർത്തുന്നതായും, സാമ്പത്തിക തിരിമറികൾ നടത്തുന്നതായും യു.എസ് ഷോർട് സെല്ലിങ് സ്ഥാപനമായ ഹിൻഡൻബർഗ് റിസർച്ച് ആരോപിക്കുകയായിരുന്നു. ഇതേത്തുടർന്ന് അദാനി ഗ്രൂപ്പിലെ ലിസ്റ്റ് ചെയ്ത 10 ഓഹരികളുടെയും വില തകർന്നു വീണു.
ഹിൻഡബർഗ് ഏല്പിച്ച ആഘാതം മാസങ്ങളോളം നീണ്ടു നിന്നു. തിരിച്ചു കയറാൻ അദാനി ഓഹരികൾ ബുദ്ധിമുട്ടി. ഇതോടെ വായ്പകൾ തിരിച്ചടയ്ക്കാനും, ഇൻവെസ്റ്റ്മെന്റ് ആകർഷിച്ച് നിക്ഷേപകരുടെ ആത്മവിശ്വാസം വീണ്ടെടുക്കാനും അദാനി ഗ്രൂപ്പ് ശ്രമിച്ചു.
ഇത്തരം പ്രതിസന്ധികൾക്കിടെ കഴിഞ്ഞ വർഷം മാർച്ചിൽ മുന്ദ്ര പ്ലാന്റിന്റെ നിർമാണം താൽക്കാലികമായി നിർത്തി വെക്കേണ്ടി വന്നു.
പ്ലാന്റിലെ ഉപകരണങ്ങൾ സ്ഥാപിക്കലും, സൈറ്റ് നിർമാണവുമെല്ലാം ഇത്തരത്തിൽ നിലയ്ക്കുകയായിരുന്നു.
പിന്നീട് കഴിഞ്ഞ ജൂലൈയിലാണ് നിർമാണ പ്രവർത്തനങ്ങൾ വീണ്ടും ആരംഭിച്ചത്. ഈ സമയത്ത് ആകെ 25000-27000 കോടി രൂപയാണ് മൂലധനച്ചെലവായി ആവശ്യമുണ്ടായിരുന്നത്.
റിപ്പോർട്ടുകൾ പ്രകാരം വലിയ വായ്പ അദാനിക്ക് നൽകുന്ന എസ്.ബി.ഐ, മറ്റ് ബാങ്കുകൾക്ക് നൽകുന്ന വായ്പാ വിഹിതം 17000 കോടി രൂപ വരെ കുറയ്ക്കാൻ സാധ്യതയുണ്ട്.
2026 വർഷത്തോടെ അദാനി പെട്രോകെമിക്കൽസ് പ്ലാന്റിന്റെ ആദ്യഘട്ട നിർമാണം പൂർത്തിയാകുമെന്നാണ് പ്രതീക്ഷിക്കപ്പെടുന്നത്.
