മുംബൈ: അംഗീകാരമില്ലാത്ത ഓൺലൈൻപ്ലാറ്റ്‌ഫോമുകളിലൂടെ ലിസ്റ്റ് ചെയ്യാത്ത കമ്പനികളുടെ കടപ്പത്രങ്ങളിൽ നിക്ഷേപം നടത്തുന്നതിനെതിരെ മുന്നറിയിപ്പുമായി സെബി.
അംഗീകാരമില്ലാത്ത പ്ലാറ്റ്‌ഫോമുകളിൽ പണം മുടക്കരുത്. അടുത്തിടെ, രജിസ്റ്റർ ചെയ്യാത്ത ഓൺലൈൻ പ്ലാറ്റ്‌ഫോമുകൾ പ്രവർത്തിപ്പിക്കുന്ന ചില സ്ഥാപനങ്ങൾക്കെതിരെ സെബി ഇടക്കാല ഉത്തരവ് പുറപ്പെടുവിച്ചിരുന്നു.
രജിസ്റ്റർ ചെയ്യാത്ത ഓൺലൈൻ പ്ലാറ്റ്ഫോമുകളിലൂടെ നിക്ഷേപകർക്ക് ലിസ്റ്റുചെയ്യാത്ത കമ്പനികളുടെ കടപ്പത്രങ്ങൾ വാഗ്ദാനം ചെയ്യുന്നുണ്ട്. ഈ പ്ലാറ്റ്‌ഫോമുകൾ ഏതെങ്കിലും റെഗുലേറ്ററി സ്ഥാപനങ്ങളുടെ മേൽനോട്ടത്തിന് വിധേയമല്ല.
ഇതിൽ പണം മുടക്കുന്നവർക്ക് അടിസ്ഥാന നിക്ഷേപക പരിരക്ഷയോ നിക്ഷേപകരുടെ പരാതികൾക്ക് പരിഹാരം കാണാനുള്ള മാർഗങ്ങളോ ഇല്ല. രജിസ്റ്റർ ചെയ്യാത്ത ഓൺലൈൻ പ്ലാറ്റ്‌ഫോമുകളിലൂടെയുള്ള, ലിസ്റ്റുചെയ്യാത്ത കമ്പനികളുടെ കടപ്പത്രങ്ങളുടെ വിൽപ്പന സെബി നിയമങ്ങൾക്കെതിരാണ്.
കമ്പനി നിയമം, 2013 ലെ സെബി നിയമം, 1992ലെ സെബി ചട്ടങ്ങൾ എന്നിവയുടെയൊക്കെ ലംഘനമാണ് ഇത്തരം പ്രവർത്തനങ്ങൾ.അതേസമയം നിക്ഷേപകർക്ക് ലിസ്റ്റ് ചെയ്യാത്ത കമ്പനികളുടെ സെക്യൂരിറ്റികൾ വാഗ്ദാനം ചെയ്യാം.
അംഗീകാരം ഇല്ലാത്ത പ്ലാറ്റ്‌ഫോമുകളിൽ ഇടപാടുകൾ നടത്തരുതെന്ന് സെബി നിക്ഷേപകരോട് ആവശ്യപ്പെട്ടിട്ടുണ്ട്. രജിസ്റ്റർ ചെയ്യാത്ത പ്ലാറ്റ്‌ഫോമുകൾ പ്രവർത്തിപ്പിക്കുന്ന സ്ഥാപനങ്ങൾക്കെതിരെ സെബി നടപടികൾ സ്വീകരിക്കുന്നുണ്ട്.
ലിസ്റ്റ് ചെയ്ത ഡെറ്റ് സെക്യൂരിറ്റികളിൽ നിക്ഷേപിക്കുന്നതിന് ഓൺലൈൻ ബോണ്ട് പ്ലാറ്റ്‌ഫോം ദാതാക്കളായി പ്രവർത്തിക്കുന്നതിന് ബോംബെ സ്റ്റോക്ക് എക്‌സ്‌ചേഞ്ച് , നാഷണൽ സ്റ്റോക്ക് എക്‌സ്‌ചേഞ്ച് എന്നിവയെ സെബി അധികാരപ്പെടുത്തിയിട്ടുണ്ട്.
സെബിയിൽ രജിസ്റ്റർ ചെയ്ത സ്റ്റോക്ക് ബ്രോക്കർമാർ നടത്തുന്ന ഓൺലൈൻ ബോണ്ട് പ്ലാറ്റ്‌ഫോമുകൾ മാത്രമേ ഇടപാടുകൾക്ക് ഉപയോഗിക്കാവൂവെന്ന് സെബി പറയുന്നു.
ഈ പ്ലാറ്റ്‌ഫോമുകൾക്ക് അംഗീകാരമില്ലാത്തതിനാൽ ഇത്തരം പ്ലാറ്റ്ഫോമുകളിലൂടെ ഇടപാട് നടത്തി കബളിക്കപ്പെട്ടാൽ തർക്കപരിഹാരം സാധ്യമാകില്ല. അതേസമയം സെബിയുടെയോ സ്റ്റോക്ക് എക്‌സ്‌ചേഞ്ചുകളുടെയോ അധികാരപരിധിയിലുള്ള സ്ഥാപനങ്ങളാണെങ്കിൽ പരാതി പരിഹാരത്തിന് അവസരം ലഭിക്കും.
വ്യാജ ട്രേഡിങ് ആപ്പുകൾ പെരുകുന്നു
വ്യാജ ട്രേഡിങ് ആപ്പുകളും ഇപ്പോൾ സജീവമാണ്. വാട്ട്‌സ്ആപ്പ് ഗ്രൂപ്പുകളിലൂടെ ആളുകളെ ഇത്തരം ആപ്പുകളിൽ അംഗമാക്കി തട്ടിപ്പുകൾ വ്യാപകമാണ്. പ്രമുഖ ബ്രോക്കറേജ് പ്ലാറ്റ്‌ഫോമുകൾക്ക് സമാനമായ രീതിയിലാണ് ആപ്പുകളുടെ രൂപകൽപ്പന.
ഇത് കൂടുതൽ പേരെ ഇത്തരം ആപ്പുകളിലേക്ക് ആകർഷിക്കുന്നു. ആദ്യം വിശ്വാസം നേടുന്നതിനായി ഉപയോക്താക്കൾക്ക് തട്ടിപ്പുകാർ ചെറിയ ലാഭം വാഗ്ദാനം ചെയ്യും. ആദ്യത്തെ രണ്ട് ട്രേഡുക‌ൾക്ക് ശേഷം കൂടുതൽ പണം നിക്ഷേപിപ്പിച്ച് പണം തട്ടുന്നതാണ് രീതി.
