മുംബൈ: ഇന്ത്യൻ കാർ സർവീസ്, റിപ്പയർ സ്ഥാപനമായ ഗോമെക്കാനിക്കിൽ 35 മില്യൺ ഡോളർ നിക്ഷേപിക്കാൻ പദ്ധതിയിട്ട് സോഫ്റ്റ്ബാങ്ക്. നിക്ഷേപത്തിനായി സോഫ്റ്റ്ബാങ്ക് ഗ്രൂപ്പ് ചർച്ചകൾ നടത്തിക്കൊണ്ടിരിക്കുകയാണെന്നും. ജാപ്പനീസ് നിക്ഷേപകരുടെ ഇന്ത്യയിലെ ഏറ്റവും ചെറിയ നിക്ഷേപങ്ങളിൽ ഒന്നായിരിക്കുമിതെന്നും അടുത്ത വൃത്തങ്ങളെ ഉദ്ധരിച്ച് റോയിട്ടേഴ്സ് റിപ്പോർട്ട് ചെയ്തു.
വെഞ്ച്വർ ഇന്റലിജൻസിന്റെ കണക്കുകൾ പ്രകാരം കഴിഞ്ഞ വർഷം മാത്രം 4 ബില്യൺ ഡോളറിനടുത്ത് നിക്ഷേപം നടത്തിയ സോഫ്റ്റ്ബാങ്ക് ഇന്ത്യൻ സ്റ്റാർട്ടപ്പുകളുടെ ഒരു പ്രമുഖ പിന്തുണക്കാരാണ്. ഡിജിറ്റൽ പേയ്‌മെന്റ് സ്ഥാപനമായ പേടിഎമ്മും ഓൺലൈൻ വിദ്യാഭ്യാസ സ്ഥാപനമായ അൺകാഡമിയും ഇതിന്റെ വലിയ നിക്ഷേപങ്ങളിൽ ഉൾപ്പെടുന്നു.
എന്നാൽ കഴിഞ്ഞ പാദത്തിൽ നഷ്ടം രേഖപ്പെടുത്തിയതിനാൽ കമ്പനി നിക്ഷേപങ്ങളിൽ കൂടുതൽ അളന്ന സമീപനം സ്വീകരിക്കാൻ തുടങ്ങിയതായി റിപ്പോർട്ടുകൾ സൂചിപ്പിക്കുന്നു. ഗോമെക്കാനിക്കിന്റെ നിലവിലെ മൂല്യം 700 മില്യൺ ഡോളറിന് അടുത്താണ്. സോഫ്റ്റ ബാങ്കിന് പുറമെ സോവറിൻ ഫണ്ടായ ഖസാനയും നിലവിലുള്ള നിക്ഷേപകനായ ടൈഗർ ഗ്ലോബലും കമ്പനിയിൽ 100 മില്യൺ ഡോളർ നിക്ഷേപിക്കാൻ പദ്ധതിയിടുന്നുണ്ടെന്ന് റോയിട്ടേഴ്സ് റിപ്പോർട്ട് ചെയ്യുന്നു.
2016-ൽ സ്ഥാപിതമായ ഗോമെക്കാനിക്ക്, അതിന്റെ സർവീസ് സെന്ററുകളിലൂടെ ഇതുവരെ രണ്ട് ദശലക്ഷത്തിലധികം കാറുകൾ സർവീസ് ചെയ്യുകയും നന്നാക്കുകയും ചെയ്തിട്ടുണ്ട്. കൂടാതെ കമ്പനിക്ക് നിലവിൽ 40 മില്യൺ ഡോളറിന്റെ വാർഷിക വരുമാനമുണ്ട്.
