കോഴിക്കോട്: സൂപ്പർ ലീഗ് കേരള ഫുട്ബോളില്‍ ഞായറാഴ്ചനടന്ന കാലിക്കറ്റ് എഫ്.സി.-ഫോഴ്സ കോച്ചി ഫൈനലിന് കോഴിക്കോട് കോർപ്പറേഷൻ സ്റ്റേഡിയത്തിലേക്ക് കാണികള്‍ ഇരമ്ബിയെത്തിയപ്പോള്‍ പിറന്നത് സീസണിലെ റെക്കോഡ്.
ഔദ്യോഗിക കണക്കില്‍ നടപ്പുസീസണില്‍ ഏറ്റവും കൂടുതല്‍ ആളുകള്‍ സ്റ്റേഡിയത്തില്‍ വന്നുകണ്ട മത്സരമാണിത്. കൊച്ചിയില്‍ കേരള ബ്ലാസ്റ്റേഴ്സ്-ബെംഗളൂരു ഐ.എസ്.എല്‍. മത്സരത്തിനെത്തിയ കാണികളുടെ എണ്ണത്തെയാണ് മറികടന്നത്.
സൂപ്പർ ലീഗ് കേരള ഫൈനലില്‍ കാലിക്കറ്റ്-കൊച്ചി മത്സരം കാണാൻ കോർപ്പറേഷൻ സ്റ്റേഡിയത്തിലെത്തിയത് 35,672 പേരെന്നാണ് ഔദ്യോഗിക കണക്ക്. ബ്ലാസ്റ്റേഴ്സ്-ബെംഗളൂരു എഫ്.സി. മത്സരം കാണാൻ കൊച്ചിയിലെ നെഹ്റു സ്റ്റേഡിയത്തിലെത്തിയത് 34,940 പേരാണ്. ഇതുപ്രകാരം ഐ.എസ്.എല്ലിനെ മറികടക്കുന്ന പ്രകടനമാണ് സൂപ്പർ ലീഗ് കേരള പ്രഥമ സീസണില്‍ത്തന്നെ നടത്തിയത്.
സൂപ്പർ ലീഗില്‍ കോഴിക്കോട്ടും തിരുവനന്തപുരത്തും പ്രതീക്ഷിച്ചതിനെക്കാള്‍ കാണികള്‍ മത്സരം കാണാനെത്തി. കാലിക്കറ്റ്-തിരുവനന്തപുരം കൊമ്ബൻസ് സെമിഫൈനലിന് 15,867 കാണികളുണ്ടായിരുന്നു.
മഞ്ചേരിയിലെ പയ്യനാട് സ്റ്റേഡിയത്തിലെ അവസാന ലീഗ് മത്സരത്തില്‍ മലപ്പുറവും കൊമ്ബൻസും കളിച്ചപ്പോള്‍ 10,420 പേർ സ്റ്റേഡിയത്തിലെത്തി. തിരുവനന്തപുരം ഗ്രീൻഫീല്‍ഡില്‍ അവസാന രണ്ട് കളിക്കും ശരാശരി 9000-ത്തോളം കാണികളുണ്ടായിരുന്നു.
തിരുവനന്തപുരത്തെ കാണികളുടെ പങ്കാളിത്തം സംഘാടകരെ അമ്ബരപ്പിക്കുന്നതായി. കൊച്ചിയില്‍ മാത്രമാണ് പ്രതീക്ഷിച്ചത്ര കാണികളില്ലാതെ പോയത്. പ്രഥമസീസണില്‍ കാണികളുടെ മികച്ച പങ്കാളിത്തം സംഘാടകർക്ക് ഊർജം പകരും.
