മുംബൈ: വിസ്താരയെ എയർ ഇന്ത്യയുമായി ലയിപ്പിക്കുന്നതിനുള്ള ക്രമീകരണത്തിന്റെ ഭാഗമായി സിംഗപ്പൂർ എയർലൈൻസിന് (എസ്ഐഎ) എയർ ഇന്ത്യയുടെ ഓഹരി വാഗ്ദാനം ചെയ്യാൻ ടാറ്റ സൺസ് പദ്ധതിയിടുന്നു. വിസ്താരയുടെ മാതൃ കമ്പനിയായ ടാറ്റ എസ്ഐഎ എയർലൈൻസിൽ സിംഗപ്പൂർ എയർലൈൻസിന് 49 ശതമാനം ഓഹരിയുണ്ടെന്ന് ഇക്കണോമിക് ടൈംസ് (ഇടി) റിപ്പോർട്ട് ചെയ്യുന്നു.
വിസ്താരയുടെയും എയർ ഇന്ത്യയുടെയും ലയനത്തോടെ ഒരു എയർലൈൻ ബ്രാൻഡിനെ മാത്രം തങ്ങളുടെ പരിധിയിൽ നിലനിർത്താനാണ് ടാറ്റ സൺസ് ലക്ഷ്യമിടുന്നത്. നിലവിൽ വിസ്താരയിൽ ഗ്രൂപ്പിന് 51 ശതമാനം ഓഹരിയുണ്ട്.
ലയനത്തിന് ശേഷം ഇൻഡിഗോയ്ക്ക് പിന്നിൽ ഇന്ത്യയിലെ ഏറ്റവും വലിയ വിമാനക്കമ്പനിയായി എയർ ഇന്ത്യ മാറും. കൂടാതെ എയർഏഷ്യ ഇന്ത്യ, എയർ ഇന്ത്യ എക്സ്പ്രസ് എന്നിവയുൾപ്പെടെ മറ്റ് എയർലൈനുകളെ ഒരു ബ്രാൻഡിന് കീഴിൽ ലയിപ്പിക്കാനും കമ്പനി പദ്ധതിയിടുന്നുണ്ട്.
എയർ ഏഷ്യ, വിസ്താര, എയർ ഇന്ത്യ എന്നീ മൂന്ന് എയർലൈനുകളെ ഏകീകരിക്കുന്നത് ടാറ്റ ഗ്രൂപ്പിന് കൂടുതൽ പ്രവർത്തനക്ഷമത നൽകുമെന്ന് മാത്രമല്ല, വിമാനങ്ങളും എഞ്ചിൻ നിർമ്മാതാക്കളും പോലുള്ള ഒഇഎമ്മുകളുമായുള്ള ഇടപാടുകളിൽ മികച്ച വിലപേശൽ ശക്തിയിൽ നിന്ന് പ്രയോജനം നേടാൻ കഴിയുമെന്നും വിദഗ്‌ധർ അഭിപ്രായപെട്ടു.
ഗ്രൂപ്പിന്റെ എയർലൈൻ ബിസിനസുകൾ നേരിയ മാർജിനുകളിലാണ് പ്രവർത്തിക്കുന്നതെന്നും. പ്രവർത്തന കാര്യക്ഷമത ഉറപ്പാക്കാനും ചെലവുകളുടെ നിയന്ത്രണം നിലനിർത്താനും കമ്പനികളെ ഏകീകരിക്കേണ്ടതുണ്ടെന്നും ടാറ്റ സൺസ് ചെയർമാൻ എൻ ചന്ദ്രശേഖരൻ നേരത്തെ വ്യക്തമാക്കിയിരുന്നു.
