മുതിർന്ന പൗരന്മാരായ നിക്ഷേപകർക്ക് ഒരു ബാങ്കിലെ സ്ഥിരനിക്ഷേപം അല്ലെങ്കിൽ ഫിക്സഡ് ഡിപ്പോസിറ്റിൽ (എഫ്ഡി) നിന്നും ലഭിക്കുന്ന പലിശ ഇനത്തിലുള്ള വരുമാനത്തിന് സ്രോതസ്സിൽ നിന്നുള്ള നികുതി അഥവാ ടിഡിഎസ് ബാധകമായിരുന്ന പരിധി ഇരട്ടിയാക്കി വർധിപ്പിക്കുമെന്ന് ഇത്തവണത്തെ പൊതുബജറ്റിൽ കേന്ദ്രമന്ത്രി നിർമല സീതാരാമൻ പ്രഖ്യാപിച്ചിരുന്നു.
ഈ നിർദേശം 2025 ഏപ്രിൽ ഒന്ന് മുതൽ പ്രാബല്യത്തിൽ വരികയാണ്. ഇതോടെ നിലവിലെ 50,000 രൂപയിൽ നിന്നും ഒരു ലക്ഷം രൂപയായി ടിഡിഎസ് ബാധകമാക്കുന്ന പലിശ വരുമാനത്തിന്റെ പരിധി ഉയർത്തപ്പെടും.
അതായത് അടുത്ത സാമ്പത്തിക വർഷം (2025-26) മുതൽ ഒരു ബാങ്കിലെ സ്ഥിരനിക്ഷേപത്തിൽ നിന്നും ലഭിക്കുന്ന വാർഷിക പലിശ ഒരു ലക്ഷം രൂപ നിലവാരം കവിയുമെങ്കിൽ മാത്രമേ ടിഡിഎസ് നികുതി ഈടാക്കുകയുള്ളു എന്ന് സാരം.
നിലവിലെ ടിഡിഎസ് നികുതി നിരക്ക് 10 ശതമാനമാണ്. എന്നാൽ മുതിർന്ന പൗരന്മാരായ (സീനിയർ സിറ്റിസൺ) നിക്ഷേപകർ ബാങ്ക് അക്കൗണ്ടിൽ പാൻ കാർഡ് നമ്പർ നൽകിയിട്ടിൽ, സ്ഥിരനിക്ഷേപത്തിൽ നിന്നും ഈടാക്കുന്ന ടിഡിഎസ് 20 ശതമാനം നിരക്കിലായിരിക്കും.
ടിഡിഎസ് ഒഴിവാക്കാൻ കഴിയുമോ?
അതേസമയം ഒരു മുതിർന്ന പൗരന്റെ ഒരു സാമ്പത്തിക വർഷത്തിനിടയിലെ മൊത്തം വരുമാനം, ആദായ നികുതി ബാധകമാകുന്ന അടിസ്ഥാന വരുമാന പരിധിയിലും താഴെയാണെങ്കിൽ ഫോം 15-H, ബാങ്കിൽ സമർപ്പിച്ചാൽ പലിശ വരുമാനത്തി നിന്നും ടിഡിഎസ് ഈടാക്കുകയില്ല.
അതുപോലെ വ്യക്തിയുടെ മൊത്തം വരുമാനം ആദായ നികുതി ബാധകമാകുന്ന നിലയിലുണ്ടെങ്കിലും അവരുടെ അറ്റ നികുതി ബാധ്യത സ്രോതസ്സിൽ നിന്നും ഈടാക്കിയ നകുതിയേക്കാൾ കുറവാണെങ്കിൽ അവർക്ക് ടിഡിഎസ് റീഫണ്ട് ലഭിക്കുന്നതാണ്.
ഇതിനായി ആദായ നികുതി റിട്ടേൺ ഫയൽ ചെയ്യണമെന്ന് മാത്രം. നിലവിൽ മുതിർന്ന പൗരന്മാർക്ക് ഉയർന്ന പലിശ വാഗ്ദാനം ചെയ്യുന്ന സ്ഥിരനിക്ഷേപ പദ്ധതികൾ ചുവടെ ചേർക്കുന്നു.
സ്മോൾ ഫിനാൻസ് ബാങ്കുകളിലെ ഉയർന്ന പലിശ നിരക്ക്
ഉത്കർഷ് സ്മോൾ ഫിനാൻസ് ബാങ്ക് : രണ്ട് മുതൽ മൂന്ന് വർഷം വരെയോ അല്ലെങ്കിൽ 1,500 ദിവസത്തേക്കോ ഉള്ള മുതിർന്ന പൗരന്മാരുടെ സ്ഥിരനിക്ഷേപങ്ങൾക്ക് 9.10% നിരക്കിൽ പലിശ ലഭിക്കും.
യൂണിറ്റി സ്മോൾ ഫിനാൻസ് ബാങ്ക് : 1,001 ദിവസത്തെ സ്ഥിരനിക്ഷേപത്തിന് 9.10% നിരക്കിൽ പലിശ നൽകും.
സൂര്യോദയ് സ്മോൾ ഫിനാൻസ് ബാങ്ക് : അഞ്ച് വർഷത്തെ സ്ഥിരനിക്ഷേപത്തിന് 9.10% നിരക്കിൽ പലിശ ലഭിക്കും.
നോർത്ത് ഈസ്റ്റ് സ്മോൾ ഫിനാൻസ് ബാങ്ക് : 18 മാസം ഒരു ദിവസം മുതൽ 36 മാസം വരെയുള്ള സ്ഥിരനിക്ഷേപങ്ങൾക്ക് 9.00% നിരക്കിൽ പലിശ നൽകും.
ഇക്വിറ്റാസ് സ്മോൾ ഫിനാൻസ് ബാങ്ക് : 888 ദിവസത്തെ സ്ഥിരനിക്ഷേപത്തിന് 9.00% നിരക്കിൽ പലിശ ലഭിക്കും.
സ്വകാര്യ ബാങ്കുകളിലെ ഉയർന്ന പലിശ നിരക്ക്
എസ്ബിഎം ബാങ്ക് : 18 മാസം മുതൽ രണ്ട് വർഷവും മൂന്ന് ദിവസത്തിന് താഴെയുമുള്ള കാലാവധിയിലേക്കുള്ള മുതിർന്ന പൗരന്മാരുടെ സ്ഥിരനിക്ഷേപത്തിന് 8.75% നിരക്കിൽ പലിശ ലഭിക്കും.
ബന്ധൻ ബാങ്ക് : ഒരു വർഷത്തേക്കുള്ള സ്ഥിരനിക്ഷേപത്തിന് 8.55% നിരക്കിൽ പലിശ നേടാം.
ഡിസിബി ബാങ്ക് : 15 മാസം മുതൽ 16 മാസത്തിന് താഴെയുള്ള സ്ഥിരനിക്ഷേപങ്ങൾക്ക് 8.50% നിരക്കിൽ പലിശ ലഭിക്കും.
ആർബിഎൽ ബാങ്ക് : 500 ദിവസത്തേക്കുള്ള സ്ഥിരനിക്ഷേപത്തിന് 8.50% നിരക്കിൽ പലിശ നേടാം.
യെസ് ബാങ്ക് : 18 മാസത്തേക്കുള്ള സ്ഥിരനിക്ഷേപത്തിന് 8.50% നിരക്കിൽ പലിശ ലഭിക്കും.
പൊതുമേഖല ബാങ്കുകളിലെ ഉയർന്ന പലിശ നിരക്ക്
പഞ്ചാബ് & സിന്ധ് ബാങ്ക് : 555 ദിവസത്തെ സ്ഥിരനിക്ഷേപത്തിന് 7.95% നിരക്കിൽ പലിശ ലഭിക്കും.
ബാങ്ക് ഓഫ് മഹാരാഷ്ട്ര : 366 ദിവസത്തെ സ്ഥിരനിക്ഷേപത്തിന് 7.95% നിരക്കിൽ പലിശ ലഭിക്കും.
കാനറ ബാങ്ക് : 3 വർഷം മുതൽ 5 വർഷത്തിന് താഴെയുള്ള സ്ഥിരനിക്ഷേപത്തിന് 7.90% നിരക്കിൽ പലിശ ലഭിക്കും.
വിദേശ ബാങ്കുകളിലെ ഉയർന്ന പലിശ
ഡോയ്ചെ ബാങ്ക് : ഒരു വർഷം മുതൽ മൂന്ന് വർഷം വരെയുള്ള മുതിർന്ന പൗരന്മാരുടെ സ്ഥിരനിക്ഷേപത്തിന് 8.00% നിരക്കിൽ പലിശ കിട്ടും.
എച്ച്എസ്ബിസി ബാങ്ക് : 601 മുതൽ 699 ദിവസം വരെയുള്ള സ്ഥിരനിക്ഷേപത്തിന് 8.00% നിരക്കിൽ പലിശ ലഭിക്കും.
സ്റ്റാൻഡേഡ് ചാർട്ടേഡ് ബാങ്ക് : സ്ഥിരനിക്ഷേപത്തിന് 8.00% നിരക്കിൽ പലിശ കിട്ടും.
