കൊച്ചി: ഒരു മാസത്തെ ക്ഷേമ പെൻഷൻ(welfare pension) വിതരണം ഇന്നലെ മുതൽ തുടങ്ങി. ഓണത്തിന്(Onam) മുമ്പ് ഒന്ന് രണ്ട് ഗഡുക്കൾ കൂടെ വിതരണം ചെയ്യാനാകുമോ എന്ന് നോക്കുകയാണ് സർക്കാർ. നിലവിൽ അഞ്ചു മാസത്തെ തുക കുടിശ്ശികയാണ്(arrears).
ഓണത്തിന് മുന്നോടിയായി 4,800 രൂപ വിതരണം ചെയ്തേക്കും എന്നാണ് സൂചന. സംസ്ഥാനത്ത് 60 ലക്ഷത്തോളം ക്ഷേമ പെൻഷൻ ഗുണഭോക്താക്കൾ ആണുള്ളത്.
പെൻഷൻ, ശമ്പള വിതരണം ഉൾപ്പെടെയുള്ള ചെലവുകൾക്കായി സർക്കാർ 3,000 കോടി രൂപ കടം എടുത്തിരുന്നു.
ഈ സാമ്പത്തിക വർഷം അവസാനത്തോടെ എല്ലാ ക്ഷേമ പെൻഷൻ കുടിശ്ശികകളും തീർക്കുമെന്ന് മുഖ്യമന്ത്രി പിണറായി വിജയൻ കഴിഞ്ഞ മാസം വ്യക്തമാക്കിയിരുന്നു. ക്ഷേമ പെൻഷൻ കുടിശിക വിതരണത്തിനായി 104 കോടി രൂപയോളം ചെലവാണ് പ്രതീക്ഷിക്കുന്നത്.
ക്ഷേമ പെൻഷൻ വിഭാഗത്തിൽ വാ‍ർദ്ധക്യ കാല പെൻഷൻ, വിധവാ പെൻഷൻ, വികലാംഗ പെൻഷൻ എന്നിവയും ഉൾപ്പെടുന്നു. അഞ്ച് സാമൂഹ്യ പെൻഷനുകളാണുള്ളത്. ക്ഷേമ പെൻഷന് വാർഷിക വരുമാന പരിധി ഒരു ലക്ഷം രൂപയാണ്.
സാമൂഹ്യ സുരക്ഷാ പെൻഷൻ വിതരണത്തിൻ്റെ ഭൂരിഭാഗം വിഹിതവും സംസ്ഥാന സർക്കാർ തന്നെയാണ് നൽകുന്നത്. അവശ കലാകാരമാർ, സർക്കസ്‌ കലാകാരൻമാർ എന്നിവർക്കും സർക്കാർ പെൻഷൻ നൽകുന്നുണ്ട്. ഇതും 1,600 രൂപയാണ്.
ഏഴര വർഷത്തിനുള്ളിൽ എൽഡിഎഫ് സർക്കാർ 57,604 കോടി രൂപയാണ് പെൻഷൻ വിതരണത്തിനായി സർക്കാർ ചെലവഴിച്ചത്. കേന്ദ്രത്തിൻെറ വിഹിതം മുടങ്ങിയപ്പോഴും സംസ്ഥാനത്ത് പെൻഷൻ വിതരണം തുടർന്നിരുന്നു. നിലവിൽ 4,250 കോടി രൂപയാണ് കുടിശ്ശിക തുക വിതരണം ചെയ്യാൻ വേണ്ടത്.
ക്ഷേമ പെൻഷനുള്ള പൊതു മാനദണ്ഡങ്ങൾ
- അപേക്ഷകനുള്ള വാർഷിക വരുമാനം ഒരു ലക്ഷം രൂപയിൽ കവിയരുത്.
- സർവ്വീസ് പെൻഷൻ അല്ലെങ്കിൽ കുടുംബ പെൻഷൻ വാങ്ങുന്നവരാകരുത്.
- പൊതുമേഖലാ സ്ഥാപനങ്ങളിൽ നിന്ന് വിരമിച്ചവർക്കും ക്ഷേമ പെൻഷൻ ലഭിക്കില്ല.
- ആദായ നികുതി നൽകുന്ന വ്യക്തിയാകരുത്.
- പട്ടിക വിഭാഗത്തിൽ പെട്ടവർ ഒഴികെയുള്ള അപേക്ഷകൻ്റെ പേരിലോ കുടുംബത്തിൻ്റെ പേരിലോ രണ്ടേക്കറിൽ കൂടുതൽ വസ്തു ഉണ്ടാകരുത്.
- 1,000 സിസിയിൽ കൂടുതൽ എഞ്ചിൻ കപ്പാസിറ്റിയുള്ള, നാലോ അതിലധികമോ ചക്രങ്ങൾ ഉള്ള വാഹനങ്ങൾ സ്വന്തമായി ഉള്ള വ്യക്തികൾ ആകരുത്.
- ടാക്സി വാഹനങ്ങൾക്ക് ഇത് ബാധകമല്ല. അംബാസഡറിനും നിബന്ധന ബാധകമാകില്ല.
