യുകെയിൽ സാമ്പത്തിക പ്രതിസന്ധി മുറുകുന്നു; വാടക വീടുകൾക്കും നിരക്ക് കുതിച്ചുയരുന്നു

കുടിയേറ്റം കൂടിയതോടെ യുകെയിൽ വാടക വീടുകളുടെ നിരക്ക് കുതിച്ച് ഉയരുയാണ്. എന്തെങ്കിലും ഒരു ജോലി സ്വപ്നം കണ്ട് യുകെയിൽ എത്തുന്നവർക്കും നാടു വിടുന്നവർക്കുമൊക്കെ തിരിച്ചടിയാകുന്ന രീതിയിലാണ് കാര്യങ്ങൾ.

ശമ്പളത്തിൻ്റെ നല്ലൊരു ശതമാനവും വാടകയ്ക്ക് പോകുന്നു. ഉയർന്ന പണപ്പെരുപ്പം നിലനിൽക്കുന്നതിനാൽ ഭക്ഷണത്തിനും മറ്റ് ചെലവുകൾക്കും ഒക്കെ പണം കണ്ടെത്താൻ യുകെയിൽ എത്തുന്ന പലരും ബുദ്ധിമുട്ടുന്നു.

വാടക വീടുകളുടെ മാത്രമല്ല, മറ്റ് പ്രോപ്പർട്ടികളുടെയും നിരക്ക് ഉയരുകയാണ്. സമീപ വർഷങ്ങളിലും നിരക്ക് വർധന തുടരുമെന്നാണ് സൂചന. ബാങ്ക് ഓഫ് ഇംഗ്ലണ്ട് പലിശ നിരക്ക് കുറച്ചിരിക്കുന്നതിനാൽ ലോൺ എടുത്ത് വീട് വാങ്ങാനും സ്ഥലം വാങ്ങാനും തയ്യാറായി നിരവധിപേർ മുന്നോട്ട് വരുന്നുണ്ട്.

ഇത് വീടുകളുടെ ഡിമാൻഡും ഉയർത്തുന്നു. ഈ അവസരം പ്രോപ്പർട്ടി ഡവലപ്പർമാരും വാടകക്ക് വീടു നൽകുന്നവരും ഒക്കെ മുതലാക്കിക്കൊണ്ടിരിക്കുന്നു.

റെക്കോര്‍ഡ് വാടകയാണ് ബ്രിട്ടനിലിപ്പോൾ. സ്റ്റുഡിയോ അപ്പാർട്മെൻ്റുകളും ചെറിയ വീടുകളും ഒന്നും കിട്ടാനില്ലാത്തതാണ് സ്ഥിതി. പുതിയ പ്രോപ്പര്‍ട്ടികള്‍ക്കായി ചോദിക്കുന്ന ശരാശരി വാടക പ്രതിമാസം 1.40 ലക്ഷം രൂപയായാണ്. ലണ്ടനിൽ ആണെങ്കിൽ തുക വീണ്ടും ഉയരും.

വരും വർഷങ്ങളിലും വില കുതിക്കും

യുകെയിലെ പ്രോപ്പർട്ടി മാർക്കറ്റിലെ വലിയ കുതിച്ചുചാട്ടം വരും വർഷങ്ങളിലും തുടരുമെന്നാണ് സൂചന. കഴിഞ്ഞ പത്ത് മാസത്തിലെ ഏറ്റവും വലിയ വിലക്കയറ്റമാണ് വിപണിയിൽ ഉണ്ടായിരിക്കുന്നത്.

വീടുകളുടെ വിലയിൽ ഏകദേശം 1.5 ശതമാനം മുതലാണ് വർധന. ശരാശരി ഭവന വില 5.7 ലക്ഷം രൂപയാണ് വർധിച്ചിരിക്കുന്നത്. 370,000 പൗണ്ടൊക്കെ സാധാരണമായിരിക്കുന്നു.

യുകെയിലെ ഏറ്റവും വലിയ പ്രോപ്പർട്ടി വെബ്സൈറ്റ് ആയ റൈറ്റ് മൂവിൻ്റെ കണക്കുകൾ അനുസരിച്ച് വീടുകൾ വാങ്ങാൻ ശ്രമിക്കുന്നവരുടെ എണ്ണത്തിലുള്ള വർദ്ധനവും വീടിൻ്റെ വില കുതിച്ചുയരാനുള്ള കാരണമാണ്.

പ്രോപ്പർട്ടി മാർക്കറ്റിൽ മുതൽ മുടക്കിയവരെ സംബന്ധിച്ചിടത്തോളം വില വർദ്ധനവ് ഗുണകരമായ കാര്യമാണ്. എന്നാൽ യുകെയിലെത്തി ഒരു വീട് സ്വന്തമാക്കാൻ ആഗ്രഹിക്കുന്ന പുതിയ കുടിയേറ്റക്കാർക്ക് ഇത് തിരിച്ചടിയാണ്.

വാടകയ്ക്ക് വീടുകൾ അന്വേഷിക്കുന്നവർക്ക് നിലവിലെ സാഹചര്യത്തിൽ വാടക വീടിനായി വൻ തുകയാണ് ചെലവഴിക്കേണ്ടി വരുന്നത്. യുകെയിലെ സാമ്പത്തിക മാന്ദ്യവും നിലവിലെ സാഹചര്യങ്ങളും പരിശോധിച്ചാൽ ഇനി കുടിയേറ്റം ലക്ഷ്യമിടുന്നവർക്ക് യുകെ ആത്ര ആകർഷകമായ ഒരു ഓപ്ഷനാകില്ല.

മദ്ധ്യവർഗവരുമാനക്കാർ പട്ടിണിയിലാകുന്നതും തൊഴിലില്ലായ്മയും പണപ്പെരുപ്പവും ഉയരുന്നതുമൊക്കെയാണ് ഇപ്പോഴത്തെ കാഴ്ചകൾ.