സൗദി അറേബ്യയിൽ വൻ നിക്ഷേപത്തിനൊരുങ്ങി ഇന്ത്യയിലെ വേദാന്ത ഗ്രൂപ്പ്. വേദാന്ത ലിമിറ്റ‍ഡിന്റെ സബ്സിഡിയറിയായ വേദാന്ത കോപ്പർ ഇൻർനാഷണൽ സൗദിയിൽ 2 ബില്യൺ ഡോളർ നിക്ഷേപിക്കും.
ഇതുമായി ബന്ധപ്പെട്ട കരാറിൽ കമ്പനി ഒപ്പു വെച്ചു. സൗദിയിൽ കോപ്പർ പ്രൊജക്ടുകളുടെ വികസനവുമായി ബന്ധപ്പെട്ടതാണ് കരാർ.
ഇന്ത്യയിൽ നിന്ന് മിഡിൽ ഈസ്റ്റിലേക്ക് കമ്പനി ചുവടു മാറ്റുന്നു എന്നതിന്റെ സൂചന കൂടിയായി ഇത് വിലയിരുത്തപ്പെടുന്നു. പ്രതിവർഷം 400,000ടൺ ഗ്രീൻഫീൽഡ്കോപ്പർ സ്മെൽട്ടർ റിഫൈനറി എന്നിവയ്ക്കും, 300,000 ടൺ കോപ്പർ റോഡുകളുടെ നിർമാണത്തിനായുമുള്ള പദ്ധതികളാണ് നടപ്പാക്കുക. സൗദി അറേബ്യയുടെ വർധിച്ചു വരുന്ന കോപ്പർ ഡിമാൻഡ് നിറവേറ്റുക എന്നതാണ് ലക്ഷ്യം.
നിലവിൽ രാജ്യത്ത് ആവശ്യമുള്ള കോപ്പറിന്റെ ഭൂരിഭാഗവും സൗദി ഇറക്കുമതി നടത്തുകയാണ് ചെയ്യുന്നത്. ഇത്തരത്തിൽ പ്രതിവർഷം 365,000 ചൺ കോപ്പറാണ് ഇറക്കുമതി നടത്തുന്നത്. ഇത്തരത്തിൽ ഇറക്കുമതിയോടുള്ള ആശ്രിതത്ത്വം കുറയ്ക്കാനാണ് വേദാന്തയുമായുള്ള പങ്കാളിത്തത്തിലൂടെ സൗദി ലക്ഷ്യമിടുന്നത്.
കോപ്പർ അയിര് പ്രോസസ് ചെയ്ത് ശുദ്ധീകരിച്ച ലോഹമാക്കുന്നതിനായിട്ടാണ് കോപ്പർ സ്മെൽട്ടർ പ്രയോജനപ്പെടുത്തുക. ഉയർന്ന നിലവാരമുള്ള കോപ്പർ ഉല്പാദിപ്പിക്കുന്നതിനായി റിഫൈനറികളിൽ വെച്ച് ഖനനം ചെയ്ത അയിരിലെ മാലിന്യങ്ങൾ നീക്കും.
ഇത്തരത്തിൽ റിഫൈൻ ചെയ്തെടുത്ത കോപ്പർ കേബിളുകൾ, മറ്റ് ഉല്പന്നങ്ങൾ എന്നിവയാക്കി മാറ്റുന്നത് കോപ്പർ റോഡുകളിലൂടെയാണ്.
നേരത്തെ തമിഴ്നാട്ടിലെ ട്യൂട്ടിക്കോറിൻ എന്ന സ്ഥലത്ത് വേദാന്ത സ്റ്റെർലൈറ്റ് കോപ്പർ പ്ലാന്റ് ഓപ്പറേറ്റ് ചെയ്തിരുന്നു. പ്രതിവർഷം 400,000 ടൺ കോപ്പർ ഉല്പാദനമാണ് ഇവിടെ നടന്നിരുന്നത്. ഇത് ഇന്ത്യയുടെ കോപ്പർ ഡിമാൻഡിന്റെ 40% എന്ന തോതാണ്.
എന്നാൽ പാരിസ്ഥിതികവും, നിയമപരവുമായ പ്രശ്നങ്ങൾ കാരണം പിന്നീട് ഈ പ്ലാന്റ് അടച്ചു പൂട്ടുകയായിരുന്നു. ഇത് ഇന്ത്യയുടെ കോപ്പർ സപ്ലൈ ചെയിനിനെ ദോഷകരമായി ബാധിച്ചതായി റിപ്പോർട്ടുകളുണ്ടായിരുന്നു.
പ്ലാന്റ് ക്ലോസ് ചെയ്തതോടെ കോപ്പർ കൂടുതലായി കയറ്റുമതി നടത്തിയിരുന്ന ഇന്ത്യയ്ക്ക് ഇറക്കുമതിയെ ആശ്രയിക്കേണ്ടതായി വന്നതായി കണക്കുകൾ വ്യക്തമാക്കുന്നു. ഉദാഹരണത്തിന് 2018 സാമ്പത്തിക വർഷം 180,000 ടൺ കോപ്പർ കയറ്റുമതി നടത്തിയ ഇന്ത്യ, തൊട്ടടുത്ത, 2019 സാമ്പത്തിക വർഷത്തിൽ 283,000 ടൺ കോപ്പർ ഇറക്കുമതി നടത്തുകയാണ് ചെയ്തത്.
2023 സാമ്പത്തിക വർഷത്തിൽ ഇറക്കുമതി 275,000 ടൺ എന്ന നിലയിലേക്ക് ഉയർന്നപ്പോൾ, കയറ്റുമതി 61,000 ടണ്ണുകളിലേക്ക് താഴ്ന്നു. വേദാന്തയുടെ പ്ലാന്റ് അടയ്ക്കേണ്ടി വന്നത് ആയിരക്കണക്കിന് ആളുകൾക്ക് തൊഴിൽ നഷ്ടമുണ്ടാക്കുകയും, കമ്പനിയുടെ വരുമാനത്തെ ദോഷകരമായി ബാധിക്കുകയും ചെയ്തിരുന്നു.
നിലവിൽ ആഗോള തലത്തിൽ വർധിച്ചു വരുന്ന കോപ്പർ ഡിമാൻഡിന്റെ സാഹചര്യം പ്രയോജനപ്പെടുത്താനാണ് കമ്പനി ലക്ഷ്യമിടുന്നത്. റിന്യൂവബിൾ എനർജി, വൈദ്യുത വാഹനങ്ങൾ, അടിസ്ഥാന സൗകര്യ വികസനം തുടങ്ങിയ മേഖലകളുമായി ബന്ധപ്പെട്ട അവശ്യ ഘടകമാണ് കോപ്പർ എന്നത് കമ്പനിയുടെ ബിസിനസ് സാദ്ധ്യതകൾ വർധിപ്പിക്കുന്നു.
