‘നിക്ഷേപ ഗുരു’ എന്നറിയപ്പെടുന്ന വ്യക്തിയാണ് വാറൻ ബഫറ്റ്. ഓഹരി വിപണി എന്ന മഹാ സമുദ്രത്തിൽ നിന്ന് വലിയ നേട്ടമുണ്ടാക്കിയ മഹാനായ നിക്ഷേപകനാണ് അദ്ദേഹം. ബർക് ഷെയർ ഹാത്ത് വേ എന്ന നിക്ഷേപ സ്ഥാപനത്തിന്റെ സ്ഥാപകനും, ചെയർമാനുമാണ് വാറൻ.
നിലവിൽ തന്റെ പിൻഗാമിയെ പ്രഖ്യാപിച്ചിരിക്കുകയാണ് അദ്ദേഹം. 82 ലക്ഷം കോടി മൂല്യമുള്ള തന്റെ ബിസിനസ് സാമ്രാജ്യം മകനായ ഹോവാർഡ് ബഫറ്റിനെയാണ് അദ്ദേഹം ഏൽപ്പിക്കാൻ ഒരുങ്ങുന്നത്.
നിലവിൽ 94 വയസ്സുള്ള വാറൻ ബഫറ്റ് ഇപ്പോഴും സജീവമായി നിക്ഷേപങ്ങൾ നടത്തി വരുന്നു. പതിറ്റാണ്ടുകൾ നീണ്ടു നിന്ന ഊഹാപോഹങ്ങൾക്ക് വിരാമമിട്ടു കൊണ്ടാണ് വാറൻ തന്റെ പിൻഗാമിയെ തെരഞ്ഞെടുത്തിരിക്കുന്നത്.
വർഷങ്ങൾ നീണ്ട ആലോചനകൾക്ക് ശേഷമാണ് അദ്ദേഹം ഈ തീരുമാനമെടുത്തത്. കമ്പനിയുടെ ചുമതല ഏറ്റെടുക്കാൻ പോകുന്ന ഹോവാർഡ് ബഫറ്റിന്റെ പ്രായം 70 വയസ്സാണ്
66 വയസ്സുകാരനായ പീറ്റർ ബഫറ്റ്, 71 വയസ്സുള്ള സൂസൻ ആലീസ് ബഫറ്റ് എന്നിവരാണ് വാറൻ ബഫറ്റിൻരെ മറ്റ് രണ്ട് മക്കൾ. തന്റെ മൂന്ന് മക്കളെയും വിശ്വാസമുണ്ടെന്നും, ഹോവാർഡ് ബഫറ്റ് ചുമതകൾ കൈകാര്യം ചെയ്യാൻ പ്രാപ്രതനാണെന്നും വാറൻ പ്രതികരിച്ചു.
അതേ സമയം തന്റെ മുഴുവൻ സമ്പാദ്യവും മക്കൾക്കായി നീക്കി വെക്കില്ല. ആസ്തിയിൽ ഏകദേശം 120 ബില്യൺ പൗണ്ട് ജീവകാരുണ്യ പ്രവർത്തനങ്ങൾക്കായി മാറ്റി വെക്കുമെന്നും അദ്ദേഹം അറിയിച്ചു.
ഹൗവി എന്ന് വിളിപ്പേരുള്ള ഹോവാർഡ് ബഫറ്റ് തന്റെ പിതാവിന്റെ മഹത്തായ നേട്ടങ്ങൾ കണ്ടാണ് വളർന്നത്. കഴിഞ്ഞ 30 വർഷക്കാലം വാറന്റെ ചെയ്തികളെ അടുത്ത് നിന്ന് നിരീക്ഷിക്കാൻ സാധിച്ചത് തന്റെ നേട്ടമായി അദ്ദേഹം പറയുന്നു. ഈ അനുഭവ സമ്പത്തിന്റെ വെളിച്ചത്തിൽ പുതിയ വേഷം ഏറ്റെടുക്കാൻ തയ്യാറാണെന്നും അദ്ദേഹം പ്രതികരിച്ചു.
കരിയറിന്റെ തുടക്ക കാലത്ത് കൃഷിയിലും, മെഷിനറിയിലുമാണ് ഹൗവിക്ക് താല്പര്യമുണ്ടായിരുന്നത്. ഇതുമായി ബന്ധപ്പെട്ട് സ്വന്തമായി ബിസിനസുകളും ആരംഭിച്ചു. കൃഷിയിലുള്ള മകന്റെ താല്പര്യം കണ്ടറിഞ്ഞ വാറൻ, മകനായി ഒരു കൃഷിസ്ഥലം വാങ്ങി നൽകുകയും ചെയ്തു.
എന്നാൽ ഈ സ്ഥലം നൽകിയതിന് പകരമായി പിതാവിന് വാടക നൽകാനാണ് ഹൗവി തീരുമാനിച്ചത്. രക്ത ബന്ധത്തേക്കാൾ പ്രൊഫഷണൽ ബന്ധമാണ് ഇവിടെ അദ്ദേഹം തെരഞ്ഞെടുത്തത്.
കോർപറേറ്റ് ലോകത്ത് എത്തുന്നതിന് മുമ്പ് മറ്റ് പല മേഖലകളിലും ഹൗവി പ്രവർത്തിച്ചിട്ടുണ്ട്. 1993 മുതൽ അദ്ദേഹം ബെർക് ഷെയർ ഹാത്ത് വേ കോർപറേറ്റ് ബോർഡ് അംഗമാണ്. പിന്നീട് കൊക്ക കോള എന്റർപ്രൈസ്, കോൻ അഗ്ര ഫുഡ്സ്, ലിൻഡ് സേ കോർപ്പറേഷൻ തുടങ്ങിയ വൻകിട കമ്പനികളുമായി ചേർന്ന് പ്രവർത്തിച്ചത് അദ്ദേഹത്തിന്റെ നേതൃപാടവം തേച്ചു മിനുക്കാൻ സഹായിച്ചു.
പിതാവിനെപ്പോലെ ജീവകാരുണ്യ പ്രവർത്തനങ്ങളിലും ഹൗവി സജീവമാണ്. അദ്ദേഹം നേതൃത്ത്വം നൽകുന്ന ഹോവാർഡ്.ജി ബഫറ്റ് ഫൗണ്ടേഷൻ വിവിധ സേവനങ്ങൾക്കായി ഇതു വരെ 800 മില്യണിൽ അധികം ഡോളറുകൾ സംഭാവന നൽകിയിട്ടുണ്ട്.
അതെ, വാറൻ ബഫറ്റ് എന്ന മഹാരഥിയുടെ സാമ്രാജ്യം അർഹിക്കുന്ന കരങ്ങളിലേക്ക് തന്നെയാണ് ചെന്നെത്തുന്നത്.
