മുംബൈ: ഓഹരി വിപണിയിലെ(Stock Market) മുന്നേറ്റം തുടരുന്നു. 2025 സാമ്പത്തിക വർഷത്തിൽ(Financial Year) തന്നെ സെൻസെക്സ്(Sensex) ഒരു ലക്ഷം ലെവൽ തൊടുമോ എന്നതാണ് ഇപ്പോളത്തെ ച‍ർച്ചകൾ. 45 വർഷത്തിനിടെ സെൻസെക്സ് 850 മടങ്ങ് ഉയർന്നു.
സെൻസെക്സിൻ്റെ ശരാശരി വാർഷിക വളർച്ചാ നിരക്ക് 16 ശതമാനമാണ്. ഒരു ലക്ഷം ലെവൽ എന്ന നാഴികക്കല്ല് സെൻസെക്സ് 2025 സാമ്പത്തിക വർഷത്തോടെ തന്നെ പിന്നിട്ടേക്കാം എന്ന് നിരീക്ഷകർ ചൂണ്ടിക്കാട്ടുന്നു.
അപകട സാധ്യതകളും ഉണ്ടെങ്കിലും ഉയർന്ന പണലഭ്യതയും വിദേശ സ്ഥാപന നിക്ഷേപകരുടെ പണം ഒഴുക്കും ഓഹരി വിപണിയുടെ വളർച്ച വേഗത്തിലാക്കുമെന്ന് വിദഗ്ധർ ചൂണ്ടിക്കാട്ടുന്നു.തുടർച്ചയായ ദിവസങ്ങളിൽ ഓഹരി വിപണിയിൽ മുന്നേറ്റം നടക്കുകയാണ്.
സെപ്റ്റംബർ 20 വരെ 33,700 കോടി രൂപയാണ് വിദേശ സ്ഥാപന നിക്ഷേപകർ ഇന്ത്യൻ വിപണിയിലേക്ക് ഒഴുക്കിയത്.
2023 കലണ്ടർ വർഷത്തെ 1.7 ലക്ഷം കോടി രൂപയുമായിതാരതമ്യം ചെയ്യുമ്പോൾ ഈ കലണ്ടർ വർഷത്തിൽ ഇതുവരെ 92,000 കോടി രൂപ വിദേശ സ്ഥാപന നിക്ഷേപകർ നിക്ഷേപിച്ചിട്ടുണ്ട്. ഇത് വിപണിയുടെ മുന്നേറ്റത്തിൻ്റെ സാധ്യതകൾ ചൂണ്ടിക്കാട്ടുന്നു.
വിദേശ നിക്ഷേപകർക്ക് ഇന്ത്യൻ വിപണിയുടെ മൂല്യം ഉയരുന്നതിനാൽ വിപണിയിൽ ആത്മവിശ്വാസമുണ്ടെന്ന് ബിസിനസ് കൺസൾട്ടൻ്റ് സ്ഥാപനമായ എംകെ ഗ്ലോബൽ ചൂണ്ടിക്കാട്ടുന്നു.
അതേ സമയം, വിദേശ സ്ഥാപന നിക്ഷേപകരുടെ നിക്ഷേപം കുറയുകയും വളർന്നുവരുന്ന മറ്റ് വിപണികളിലേക്ക് നിക്ഷേപകർ ഫണ്ടുകൾ ഒഴുക്കുകയും ചെയ്താൽ അപകടമാകും എന്നും കൺസൾട്ടൻ്റ് സ്ഥാപനം സൂചിപ്പിക്കുന്നു.
എന്ന് ഒരു ലക്ഷം തൊടും?
1979 ഏപ്രിലിൽ സെൻസെക്സ് ആരംഭിച്ച സമയത്ത് നടത്തിയ ഒരു ലക്ഷം രൂപയുടെ നിക്ഷേപത്തിൻ്റെ മൂല്യം ഇപ്പോൾ ഇപ്പോൾ 8.5 കോടി രൂപയാണ്. 850 മടങ്ങാണ് മുന്നേറ്റം.
2025 ഡിസംബറോടെ മാത്രമേ സെൻസെക്സ് ഒരു ലക്ഷം എന്ന ലെവലിലേക്ക് കുതിക്കുകയുള്ളൂ എന്ന് നീരീക്ഷകർ പറയുന്നു. ഒരു ലക്ഷം ലെവൽ തൊടണമെങ്കിൽ സെൻസെക്‌സിന് 17.5 ശതമാനം എങ്കിലും മുന്നേറ്റം ആവശ്യമാണ്.
നിലവിലെ വിപണി മുന്നേറ്റം ലിക്വിഡിറ്റി ഫ്ലോ ഉൾപ്പെടെയുള്ള ഘടകങ്ങൾ കൊണ്ടാണ്. അടിസ്ഥാനപരമായി മാർക്കറ്റ് പ്രതിവർഷം 15 ശതമാനം വരെ റിട്ടേൺ നൽകേണ്ടതുണ്ട്.
വിപണി ഈ നിലയിലെത്താൻ 18-24 മാസങ്ങൾ വരെ വേണമെന്ന് ചില നിരീക്ഷകർ ചൂണ്ടിക്കാട്ടുന്നു. ശക്തമായ പണലഭ്യത വിപണിക്ക് പോസിറ്റീവ് ട്രെൻഡ് നൽകുന്നു.
റീട്ടെയിൽ നിക്ഷേപം കൊണ്ട് മാത്രം വിപണിക്ക് മുന്നേറാൻ ആകില്ല. ബ്ലൂചിപ്പ് കമ്പനികളുടെ പ്രകടനവും നിർണായകമാകും.
