ഭാവി സാങ്കേതിക വിദ്യാ വികസനത്തിനായി മികവിൻെറ കേന്ദ്രമൊരുക്കി വിപ്രോ. ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്‌നോളജിയുടെ ഡൽഹി കേന്ദ്രത്തിൽ ആണ് ജനറേറ്റീവ് എഐയിൽ പുതിയ സെൻറർ ഓഫ് എക്സലൻസ് കേന്ദ്രം ആരംഭിക്കുന്ന‌ത്. എഐ നവീകരണത്തിനായി 100 കോടി ഡോളർ കമ്പനി ആണ് നിക്ഷേപിക്കുന്നത്.
വിപ്രോ ലിമിറ്റഡിലെ ചീഫ് ടെക്‌നോളജി ഓഫീസർ ശുഭ ടാറ്റവർത്തിയാണ് ഇക്കാര്യം വ്യക്തമാക്കിയത്. സാങ്കേതിക വിദ്യാ രംഗത്തെ ഏറ്റവും നൂതന മേഖലയിൽ നിക്ഷേപം നടത്തുന്നതിൽ സന്തുഷ്ടരാണെന്ന് വിപ്രോ അധികൃതർ സൂചിപ്പിക്കുന്നു.
സാങ്കേതികവിദ്യയുടെ ഏറ്റവും ആവേശകരമായ വളർന്നുവരുന്ന ചില മേഖലകളിൽ ത്വരിതഗതിയിലുള്ള നവീകരണം പ്രോത്സാഹിപ്പിക്കുന്നതിന് ഐഐടി ഡൽഹിയുമായി സഹകരിക്കുന്നതിൽ ഞങ്ങൾ സന്തുഷ്ടരാണ്.
പുതിയ കേന്ദ്രം ഈ രംഗത്തെ അടിസ്ഥാനപരമായ ഗവേഷണങ്ങളെ പിന്തുണയ്ക്കും. നിർണായകമായ മേഖലയിൽ അത്യാധുനിക സേവനങ്ങൾ നൽകാനും കഴിയും. ജനറേറ്റീവ് എഐ പോലുള്ള ഉയർന്നുവരുന്ന മേഖലകളിൽ ഗവേഷണ-വികസന ശേഷി വർദ്ധിപ്പിക്കുക മാത്രമല്ല, നിലവിലുള്ളതും പുതിയതുമായ വെല്ലുവിളികൾ അഭിമുഖീകരിക്കാനും ഈ കേന്ദ്രം വഴി തെളിക്കും.
എഐ നവീകരണത്തിനായി വൻ തുകയാണ് വിപ്രോ ചെലവഴിക്കുന്നത് എന്നത് ശ്രദ്ധേയമാണ്.
ഫാക്കൽറ്റി അംഗങ്ങളുമായും ബിരുദ വിദ്യാർത്ഥികളുമായും ചേർന്ന് വിപ്രോയിലെ ഗവേഷക സംഘം പ്രവർത്തിക്കും.
എഐ, മെഷീൻ ലേണിങ്, മറ്റ് സാങ്കേതികവിദ്യകൾ എന്നിവ ഉപയോഗിച്ച് നിലവിലുള്ള ബിസിനസിലെ പ്രശ്നങ്ങൾക്കുൾപ്പെടെ പരിഹാരം കാണാൻ വിപ്രോ ടീമംഗങ്ങൾ ശ്രമിക്കും. വിദ്യാർത്ഥികൾക്ക് പുതിയ പഠനത്തിനും വളർച്ചയ്ക്കും ഗവേഷണ കേന്ദ്രം അവസരങ്ങൾ സൃഷ്ടിക്കും.
ബിസിനസിൽ മാത്രമല്ല ആരോഗ്യ മേഖലയിൽ ഉൾപ്പെടെ ആർട്ടിഫിൽ ഇന്റലിജൻസ് വിപ്ലവം തീർക്കുകയാണ്. രോഗനിർണയം, ചികിത്സ, രോഗി പരിചരണം എന്നീ മേഖലകളിൽ നൂതനമായ ഉപകരണങ്ങളുമായി ഇന്ത്യയിലെ ആരോഗ്യ സംരക്ഷണ വ്യവസായ രംഗത്തെ തന്നെ മാറ്റുകയാണ് എഐ.
ലോക സാമ്പത്തിക ഫോറം പുറത്ത് വിട്ട റിപ്പോർട്ട് അനുസരിച്ച് 2025 ഓടെ ഇന്ത്യയിലെ എഐ ചെലവ് 1,178 കോടി ഡോളറിലെത്തുമെന്നും 2035 ഓടെ ഇന്ത്യയുടെ സമ്പദ്‌വ്യവസ്ഥയിൽ ഒരു ലക്ഷം കോടി ഡോളർ സംഭാവന നൽകുമെന്നും പ്രതീക്ഷിക്കുന്നു.
ഹെൽത്ത്‌കെയർ രംഗത്തെ മാത്രം എഐ വിപണി 2028-ഓടെ 10270 കോടി ഡോളറായി വളരുമെന്നാണ് പ്രതീക്ഷിക്കുന്നു. രാജ്യത്തുടനീളം യോഗ്യരായ ഹെൽത്ത് കെയർ പ്രൊഫഷണലുകളുടെ കുറവുണ്ട്.
1,00,000 ആളുകൾക്ക് 150 ഡോക്ടർമാർ ആണ് ആഗോള ശരാശരി എങ്കിൽ ഇന്ത്യയിൽ 64 ഡോക്ടർമാർ മാത്രമാണുള്ളത്.
