സ്വിറ്റ്സർലൻഡിലെ ദാവോസിൽ നടക്കുന്ന ലോക സാമ്പത്തിക ഫോറത്തിന്റെ വാർഷിക സമ്മേളനത്തിൽ കേരളത്തിന് പ്രശംസ. 19 വർഷത്തിനു ശേഷമാണ് കേരളം ലോക സാമ്പത്തിക ഫോറം സമ്മേളനത്തിൽ പങ്കെടുക്കുന്നത്.
കേരളത്തിന്റെ വ്യവസായരംഗത്തെ മാറ്റങ്ങളെ ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡു ഉൾപ്പെടെയുള്ളവർ പ്രശംസിച്ചു. സമ്മേളനത്തിന്റെ ഭാഗമായി ഇന്ത്യൻ പ്രതിനിധിസംഘം നടത്തിയ വാർത്താ സമ്മേളനത്തിൽ ചന്ദ്രബാബു നായിഡു ആണ് കേരളത്തിന്റെ വ്യവസായ മാറ്റത്തെ മാധ്യമ പ്രവർത്തകർക്ക് മുന്നിൽ അവതരിപ്പിച്ചത്.
കേരളത്തിലെ നിക്ഷേപ സാധ്യതകൾ പരിശോധിക്കുകയാണെന്ന് ദാവോസ് സമ്മേളനത്തിൽ പങ്കെടുത്ത ആഗോള കമ്പനികളും വിവിധ രാഷ്ട്രങ്ങളുടെ പ്രതിനിധികളും വ്യക്തമാക്കിയിട്ടുണ്ട്.
ഇതിനകം 51കമ്പനികളുടെ മേധാവികളുമായും വിവിധ രാഷ്ട്രങ്ങളുടെ പ്രതിനിധി സംഘവുമായും ചർച്ച നടത്തിയതായി മന്ത്രി പി. രാജീവ് പറഞ്ഞു.
ഫെബ്രുവരിയിൽ കേരളത്തിൽ നടക്കുന്ന അന്താരാഷ്ട്ര നിക്ഷേപക സംഗമത്തിലേക്ക് ഇവരെ ക്ഷണിച്ചു. കേരളത്തിലെ നിക്ഷേപ സാധ്യതകൾ അവതരിപ്പിച്ചതായും മന്ത്രി പറഞ്ഞു. മെഡിക്കൽ ഉപകരണം, ഐടി, ലോജിസ്റ്റിക്സ് മേഖലകളിലെ പ്രമുഖ കമ്പനികൾ നിക്ഷേപ സംഗമത്തിന് പ്രതിനിധികളെ അയക്കും. സൗദി അറേബ്യ, യെമൻ ഭരണാധികാരികളുമായും പ്രതീക്ഷാവഹമായ ചർച്ച നടന്നു.
വിപ്രോ ഗ്രൂപ്പ് എക്സിക്യൂട്ടീവ് ചെയർമാൻ റിഷാദ് പ്രേംജി, ടെക് മഹീന്ദ്ര പ്രസിഡന്റ് ലക്ഷ്മൺ ചിദംബരം, ഊബർ ഫോർ ബിസിനസിന്റെ ബിസിനസ് ഡവലപ്മെന്റ്, ഫ്ളീറ്റ്സ് ആഗോള മേധാവി പ്രദീപ് പരമേശ്വരൻ, സൗദി അറേബ്യയുടെ റോയൽ കമ്മിഷൻ ഫോർ ജുബൈൽ ആൻഡ് യമ്പു പ്രസിഡന്റ് ഖാലിദ് മുഹമ്മദ് അൽ സലിം, ബൽജിയം ആസ്ഥാനമായ എ.ബി ഇൻ ബെവ് ഇന്ത്യ പ്രസിഡന്റ് കാർത്തികേയ ശർമ്മ, ഹിറ്റാച്ചി ഇന്ത്യ എം.ഡി ഡോ. ഭാരത് കൗശൽ, ഹൈൻകെൻ (Heineken) സിഇഒ ഡോൾഫ് വാൻ ഡെൻ ബ്രിങ്ക്, ഗ്രീൻകോ സിഇഒ അനിൽകുമാർ ചലമല ഷെട്ടി, ജൂബിലന്റ് ഭാരതിയ ഗ്രൂപ്പ് സ്ഥാപകൻ ഹരി എസ്. ഭാരതിയ, ഭാരത് ഫോർജ് സിഇഒ നീലേഷ് തുംഗാർ തുടങ്ങിയവരുമായി മന്ത്രിയുടെ നേതൃത്വത്തിലുള്ള സംഘം ചർച്ച നടത്തി.
ചീഫ് സെക്രട്ടറി ശാരദ മുരളീധരൻ, ലുലു ഗ്രൂപ്പ് ചെയർമാൻ എം.എ. യൂസഫലി, ധനവകുപ്പ് അഡിഷണൽ ചീഫ് സെക്രട്ടറി ഡോ.എ. ജയതിലക്, വ്യവസായ വകുപ്പ് പ്രിൻസിപ്പൽ സെക്രട്ടറി എ.പി.എം. മുഹമ്മദ് ഹനീഷ്, കെ.എസ്.ഐ.ഡി.സി എം.ഡി എസ്. ഹരികിഷോർ എന്നിവരും പങ്കെടുത്തു.
